Қозоғистон Ўзбекистон билан чегара ҳудудида Саноат кооперацияси марказини ташкил этиш учун 50 миллион АҚШ долларидан ортиқ маблағ ажратиши мумкин.
Келтирилишича, Қозоғистон парламенти Сенати Ўзбекистон билан чегара ҳудудида “Марказий Осиё” халқаро саноат кооперацияси марказини қуриш тўғрисидаги қонунни маъқуллади. Саноат кооперацияси маркази Қозоғистоннинг “Атамекен” ва Ўзбекистоннинг “Гулистон” назорат-ўтказиш пунктлари яқинида жойлашади.
Қайд этилишича, мазкур марказ ишлаб чиқариш майдончалари, омборлар ва транспорт инфратузилмасидан иборат бўлади, бу эса юк ташишни тезлаштириш, логистика харажатларини камайтириш, таъминот занжири иштирокчилари сонини қисқартириш, шунингдек, якуний истеъмолчи учун маҳсулот таннархини пасайтириш имконини беради.
Марказнинг умумий майдони 100 гектар этиб белгиланган. Ушбу ҳудудга минтақавий саноат зонаси мақоми берилади. Дастлабки ҳисоб-китобларга кўра, зарур сармоялар тахминан 27 миллиард тенгени (тахминан 54 миллион АҚШ доллари) ташкил этади.
Шавкат Мирзиёев 18 март куни Қозоғистон президенти Қосим-Жўмарт Тўқаев билан телефон орқали мулоқот қилди. Ўзбекистон—Қозоғистон стратегик шериклик ва иттифоқчилик муносабатларини янада ривожлантириш ва мустаҳкамлашнинг долзарб масалалари батафсил муҳокама қилинди. Савдони кўпайтириш, саноат кооперацияси, транспорт, энергетика, қишлоқ хўжалиги ва бошқа соҳаларда, шу жумладан ҳудудлар даражасида амалий ҳамкорлик бўйича лойиҳаларни илгари суриш мақсадида ўзаро мувофиқлашган чоралар кўриш муҳимлиги қайд этилди.
Изоҳ (0)