Oʻzbekiston adliya vaziri Ruslanbek Davletov 24-avgust kuni Qirgʻizistonning Choʻlponota shahrida boʻlib oʻtgan Shanxay hamkorlik tashkilotiga aʼzo davlatlar adliya vazirlarining oltinchi majlisida ishtirok etdi. Bu haqda Adliya vazirligi matbuot xizmati xabar berdi.
Majlis Qirgʻiziston adliya vaziri vazifasini bajaruvchi Maqsatbek Yesenaliyev raisligida boʻlib oʻtdi. Majlis ishida, shuningdek, Hindiston huquq va adliya vaziri oʻrinbosari S.Chandra, Qozogʻiston adliya vaziri M.Beketayev, Xitoy adliya vaziri oʻrinbosari Yuan Shuxung, Pokistonning Qozogʻistondagi elchisi Imtiyoz Ahmad Qozi, Rossiya adliya vaziri A.Konovalov va Tojikiston adliya vaziri R.Shohmurod ham qatnashgan. Tadbirda kuzatuvchilar sifatida Afgʻoniston adliya vaziri Abdul Basir Anvar, Belarus adliya vaziri O.Slijevskiy, Eron adliya vaziri S.Avayi, Moʻgʻuliston adliya va ichki ishlar vaziri N.Send qatnashgan.
Majlisda Ruslanbek Davletov 2017—2021-yillarda Oʻzbekistonni rivojlantirishning beshta ustuvor yoʻnalishi boʻyicha Harakatlar strategiyasi ijrosi doirasida amalga oshirilayotgan va qonun ustuvorligini taʼminlash, qonuniylikni mustahkamlash hamda fuqarolar huquq va erkinliklarini ishonchli himoya qilishga qaratilgan keng koʻlamli islohotlarga bagʻishlangan maʼruza bilan chiqish qildi. Oʻz maʼruzasida adliya vaziri yaqinda qabul qilingan Prezident farmoni asosida Oʻzbekiston Adliya vazirligi faoliyati tubdan isloh qilinayotgani, unda davlat huquqiy siyosatini amalga oshirishda alohida oʻrin berilgani haqida maʼlumot berdi.
Xususan, u adliya tarixida ilk bor tuman (shahar) boʻlinmalari, Davlat xizmatlari agentligi va uning joylardagi tarkibiy boʻlinmalari hamda Adliya vazirligi huzurida Huquqiy siyosat tadqiqot instituti tashkil etilganini qayd etdi. U notariat, advokatura va FHDYo organlari sohalarida amalga oshirilayotgan islohotlar, xususan notarial harakatlarni “yagona darcha” tamoyili asosida tasdiqlashni koʻzda tutuvchi faol notariatning yangi modeli, fuqarolik holati dalolatnomalarini raqamlashtirish boʻyicha ishlar boshlab yuborilgani, jamiyatda advokatlar mavqeini oshirish, advokatlik litsenziyasini olmasdan turib konsalting xizmatlarini koʻrsatish imkoniyati paydo boʻlganini alohida taʼkidladi.
Adliya vazirliklarini xalqaro xavfsizlikning zamonaviy tahdidlariga qarshi kurashdagi roli haqida soʻzlar ekan, u insonlar, xususan, yoshlar ongi uchun kurashni muhim vazifa sifatida qayd etdi va fuqarolarimizda ekstremistik faoliyat gʻoyasiga qarshi samarali immunitetni shakllantirish, ularning huquqiy ongi va madaniyatini oshirish orqali barchani ularning asoratlari bilan emas, balki sabablari bilan kurashishga urgʻu berishga chorladi.
Majlis yakunlari boʻyicha adliya vazirlari tomonidan ShHTning 2025-yilgacha Rivojlanish strategiyasiga muvofiq adliya vazirliklari oʻrtasidagi hamkorlikni yanada rivojlantirishni koʻzda tutuvchi Qoʻshma bayonot imzolandi.
Izoh (0)