Muxlisga xorijiy sayohat yo‘llanmasi,“komadan chiqqan” do‘stning tashrifi: Nilufar Usmonova yangi albomi taqdimotini o‘tkazdi (video)

Xonanda Nilufar Usmonova 26-yanvar kuni poytaxtdagi mehmonxonalardan birida yangi albomi hamda “Musofir ayol” nomli qo‘shig‘i taqdimotini o‘tkazdi. Taqdimotga xonandaning do‘stlari, shou-biznes vakillari va ashaddiy muxlislari tashrif buyurdi. Xonandaning taklifiga koʻra, “Daryo” muxbirlari ham taqdimotda ishtirok etib, qiziqarli reportaj tayyorlashdi. 

— Bu qoʻshiqni toʻrt yil avval sotib olgandim. Uni premyera qilish bugunga nasib etgan ekan. Bu dunyoda musofirchilikda kun koʻrib, bolalarini boqayotgan ayollar juda koʻp. Oʻzim ham bir koʻz bilan beshta bolaga onalik qilyapman. Musofirlarga oson emas. Oilasida uzoqda yurgan ayollarni koʻrganda ular haqida yomon xayolga borish kerakmas. 

Mening ham koʻp vaqtim farzandlarimdan ayro oʻtadi. Chamadonimni yetaklab, u viloyatdan bunisiga boraveraman. Bunday chogʻda bolalarimni qanchalik sogʻinishimni va ular menga qanchalik intilishini soʻz bilan tushuntirib berolmayman. Ammo bolalarni oʻqitish va yaxshi yashashlarini taʼminlash uchun harakat qilish kerak. “Musofir ayol” qoʻshigʻi ana shunday dardlarni oʻzida jamlagan tarona boʻlgan deb hisoblayman, — deydi xonanda Nilufar Usmonova.

Taqdimotga xonandaning shou-biznes olamidagi eng yaqin doʻstlari: Halima Ibragimova, Shahzoda Matchonova, Umidaxon ham tashrif buyurdi.

Bundan tashqari, qozoq, rus va hind muxlislari ham mehmon boʻlishdi. Xonanda ularga chuqur ehtirom koʻrsatib, raqsga taklif etdi. Ayniqsa, Qozogʻiston xalq artisti Alisher Karimovning taqdimotga tashrif buyurganini xonanda alohida taʼkidlab oʻtdi.

Bu qoʻshiqni xonanda nima uchun toʻrt yildan buyon ijro etmagani haqidagi savolga quyidagicha javob berdi.

— Menimcha, bunga tayyor boʻlmaganman. Sochim oqarib, dardni his qilganimdan keyin uni ijro etishga ahd qildim. Sochimga oq tushganini yashirmayman, bu nur. Yugur-yugurlar bilan ovora boʻlib, uni boʻyashga ham vaqtim boʻlmayapti, — deydi xonanda Nilufar Usmonova.

Xonanda Nilufar Usmonova salomatligida muammosi bor farzandini hech narsaga zoriqtirmay ulgʻaytirayotgan muxlisasini sahnaga taklif etib, uni tanishtirdi. Unga ezgu tilaklarini bildirib, farzandi bilan xorijda dam olish uchun ikki kishilik sayohat yoʻllanmasini taqdim etdi. Muxlisa xonandaning eʼtiboridan quvonib yigʻlab yubordi.

Nilufar Usmonovaning yangi albomi taqdimotidan to‘liq reportajni quyida tomosha qilishingiz mumkin: