Toshkentda narkokuryerlarni “samosud” qilgan guruh a’zolariga hukm o‘qildi

Toshkent shahri Shayxontohur tumanida narkokuryerlarni “samosud” qilib kelgan guruh ushlangani to‘g‘risida xabar berilgandi. UzReport telekanalida uzatilgan lavhada ma’lum qilinishicha, qonunbuzarlar javobgarlikka tortilgan.

Eslatib o‘tamiz, 2022-yil oktabr oyida ijtimoiy tarmoqlarda noma’lum shaxslar fuqaroni urayotgani aks etgan video tarqalgandi. Aniqlanishicha, noma’lum shaxslar Telegram-bot orqali giyohvand moddalarni tarqatish bilan shug‘ullangan yigitlarni Bo‘stonliq tumaniga olib borib kaltaklab tan jarohati yetkazib, ustiga “zelyonka” moddasini sepgan.

2023-yil fevral o‘rtalarida Shayxontohur tumanida narkokuryerlarni “samosud” qilib kelgan guruh ushlangandi. O‘shanda guruh rahbarlari o‘g‘rilik qilgan yoki boshlig‘ini haqoratlagan ishchilarning “aqlini kiritib qo‘yish” uchun mushtumzo‘r yigitlarni yollagani ma’lum bo‘lgandi. Har bir kaltaklangan “zakladchik” uchun 300—500 dollargacha va’da qilingan. Pullar ish bajarilib, videofakt ko‘rilgach, ijrochilarning kartasiga tashlab berilgan.

10-mart kuni Jinoyat ishlari bo‘yicha Mirobod tuman sudida mazkur jinoyat ishi bo‘yicha sud majlisi bo‘lib o‘tib, ayblanuvchilarga nisbatan sud hukmi o‘qildi.

Sud hukmiga ko‘ra, 2001-yilda tug‘ilgan (SH.A.) sudlanuvchi “Odam o‘g‘irlash” va “Qasddan badanga o‘rtacha og‘ir shikast yetkazish” jinoyatlarini sodir etganlikda aybli deb topilgan va unga nisbatan 6 yil muddatga ozodlikdan mahrum qilish jazosi tayinlangan.

Shuningdek, 2001-yilda tug‘ilgan sudlanuvchi (A.R.) “Odam o‘g‘irlash” va “Qasddan badanga o‘rtacha og‘ir shikast yetkazish” jinoyatlarini sodir etganlikda aybli deb topilgan va 5 yil 6 oy muddatga ozodlikdan mahrum qilish jazosi tayinlangan.

Suriya davlati fuqarosi bo‘lgan sudlanuvchi esa “Jinoyat haqida xabar bermaslik yoki uni yashirish” jinoyatini sodir etganlikda aybli deb topilgan va bazaviy hisoblash miqdorining 20 baravari miqdorida (6 million so‘m) jarima jazosi tayinlangan. Hibsdagi 3 kunning har bir kuni bazaviy hisoblash miqdorining ikki bir qismiga tenglashtirib, tayinlangan jazodan chegirib, unga bazaviy hisoblash miqdorining 18,5 baravari, 5,55 million so‘m miqdorida jarima jazosi qoldirilgan. Jarima davlat foydasiga undirilishi belgilangan.