Raqobat qo‘mitasi Toshkentda reklama qonunchiligini buzgan 30 dan ortiq korxona jarimaga tortilganini ma’lum qildi.
Qonun buzilish holatlari qo‘mitaning Toshkent shahar hududiy boshqarmasi tomonidan 2025-yilning yanvar va fevral oylari davomida reklama to‘g‘risidagi qonunchilik talablariga muvofiqligi yuzasidan o‘rganish va monitoring ishlari olib borilganda aniqlangan.
Olib borilgan o‘rganish natijalariga muvofiq, hududiy boshqarma maxsus komissiyasi tomonidan Toshkent shahrida faoliyat ko‘rsatayotgan 30 dan ortiq xo‘jalik yurituvchi subyektlarga, jumladan:
- “Coca-Cola ichimligi O‘zbekiston Ltd” MCHJ XK,
- “International Beverages Tashkent” MCHJ XK (Pepsi),
- “Mak Food Servis” MCHJ (Evos),
- “Lumieri” MCHJ,
- “Turan Media” MCHJ,
- “Oqtepa Food Service” MCHJ (Oqtepa lavash),
- “Baratrum” MCHJ (Safia)
ga nisbatan “Reklama to‘g‘risida”gi qonun hamda Vazirlar Mahkamasining “Tashqi reklama bozorini tartibga solish to‘g‘risida”gi 104-sonli qarori bilan tasdiqlangan nizomda belgilangan tashqi reklama va axborotni joylashtirish tartibi buzilishi yuzasidan ishlar qo‘zg‘atilib, moliyaviy jarimalar qo‘llash haqida qarorlar qabul qilingan.
Shuningdek, qonunbuzilish holatini bartaraf etish va kelgusida yo‘l qo‘ymaslik bo‘yicha bajarilishi majburiy bo‘lgan ko‘rsatmalar berilgan.
2024-yilning avgustida Raqobatni rivojlantirish va iste’molchilar huquqlarini himoya qilish qo‘mitasi reklama qonunchiligi yuzasidan barcha davlat va nodavlat telekanallarga ko‘rsatma xati yuborgandi. O‘sha yilning dekabrida Texnomart “eng zo‘r taklif” reklamasi uchun jarimaga tortilgandi.
Izoh (0)