Ўзбекистонда фуқароларга давлат хизматларини кўрсатиш сифати охирги йилларда анча ўсганини таъкидлаш керак. Аввалги кўплаб қоғозбозликлар йўқотилиб, хизмат кўрсатиш тезлиги анча ошди. Кўплаб қулайликлар яратилди ва яратилмоқда. Шу билан бирга, фуқароларнинг сарсон ва саргардончилигига сабаб бўладиган айрим чалкашликлар ҳамон учраб турганини ҳам бор гап.
“Дарё” таҳририятига 72 ёшли онахон мурожаат қилиб, ана шундай чалкашликлардан азият чекаётганини маълум қилди.
Онахоннинг айтишларича, уларга МИБ томонидан Янгийўл тумани суди қарори топширилган. Қарорда Янгийўл тумани “Туябўғиз” маҳалласидаги хонадонлардан бирининг солиқлари ўз вақтида тўланмагани учун 1 миллион сўмдан ошиқ қарздорлик юзага келгани, мазкур қарздорликни ҳамда ўз вақтида тўланмагани учун жаримани ва суд божини тўлаш кўрсатилган.
Онахоннинг таъкидлашича, узоқ йиллардан бери Тошкент шаҳридаги Яккасарой туманида истиқомат қиладилар. Янгийўлда ҳеч қачон яшамаганлар. Фақат 2020 йилда Янгийўл туманидаги “Туябўғиз” маҳалласида жойлашган ўзларига тегишли бўлган ерни сотганликларини маълум қилдилар. Аммо ерга эгалик ҳуқуқи бўлгани билан прописка ҳамиша Тошкент шаҳрида бўлганини таъкидладилар.
“Дарё” вакили вазиятга ойдинлик киритиш учун онахон билан Янгийўл тумани солиқ идорасига борди. Солиқ идораси масъули базадан текшириб, ҳақиқатан кўрсатилган манзилдаги уй-жой бошқа фуқарога тегишли экани, аммо базадаги паспорт маълумотлари онахонники эканини маълум қилди. Бу хато қандай юзага келгани бўйича саволга жавоб бера туриб, “айбдорни излаш эмас, масалани ҳал қилиш керак”лигини мулойимлик билан тушунтирди. Масалани ҳал қилиш учун эса Кадастр бўлимига юборди.
Кадастр бўлимидаги масъул эса муаммони эшитгач, “ҳозир текшириб бераман” деб ичкарига кириб кетди. Кейин эса чиқиб: “Биз томондан ҳеч қандай муаммо йўқ. Мазкур уй-жой 2020 йилда қилинган олди-сотди шартномасидаги фуқарога тегишли экани қайд этилган”, деб айтди. “Унда қандай қилиб Янгийўлда яшамайдиган онахон номига солиқдан қарздорлик борган?” деган саволга пропискани текшириш кераклигини айтиб, “паспорт столи”га юборди.
“Паспорт столи”даги масъул эса муаммони эшитиб, ҳозир текшириб берамиз, деб базага маълумотларни киритди. “Сизнинг пропискангиз Янгийўл тумани Туябўғиз маҳалласида экан”, деди кейин.
“Қанақасига, ахир бу манзилда умуман яшамаганман-ку, бир умр Тошкентда истиқомат қилганман”, деган эътирозга “балки чалкашлик юзага келгандир”, деб жавоб берди.
“Энди сиз Яккасарой тумани паспорт столига бориб, пропискангизни ўзингиз яшайдиган жойга қўйишингиз керак. Шунда автоматик равишда Янгийўлдан пропискадан ўчасиз”, деди.
“Шунда солиқ бўйича нотўғри қарздорлик бошқа келмайдими?” деб сўрадик масъулдан. “Суд қарорини бекор қилиш учун Янгийўл тумани судига бориб, апелляция беришингиз керак. Бунинг учун ўзингиз яшайдиган маҳалла идорасига борасиз. Маҳалла раиси ўша ерда узоқ йиллардан бери яшаётганингиз ҳақида акт тузиб беради. Ўша актни олиб, судга кўрсатасиз”, деган жавобни эшитдик.
Қизиқ. Қайсидир тизимдаги қайсидир масъулнинг қачондир йўл қўйган айби туфайли 70 ёшдан ошган онахон Тошкент ва Янгийўл тумани орасида сарсон-саргардон бўлмоқда. Барча маъсул идоралар айб уларда эмаслигини таъкидламоқда ва бошқа идорага бориб масалани ҳал этишни маслаҳат беряпти. Айбдор йўқ, лекин сарсон бўлаётган фуқаро бор.
Изоҳ (0)