Yangihayot tumani hokimi o‘rinbosari, tuman oila va xotin-qizlar bo‘limi boshlig‘i Iroda Abdullayeva tumanda fohishalikka qarshi kurash haqida gapirib, yangi qurilayotgan ko‘p qavatli uylardagi ijaraga berilgan xonadonlar doimiy nazoratda ekanini aytdi. Bu haqda u tuman hokimligida tashkil etilgan matbuot anjumanida gapirdi.
To‘g‘ri, bu juda ham og‘riqli holat va bu so‘zning o‘zini aytishga hatto men ozgina qiynalyapman. Bu masalada ayol qayerdan bo‘lishidan qatʼi nazar, yordam berish va ko‘maklashishimiz kerak deb o‘ylayman. Uni to‘g‘ri yo‘lga boshlashga undashimiz kerak. Chunki agar biz Yangihayot tumanida mana shu ishlarni qilish uchun sharoit yaratib bergan bo‘lsak, bu bizning aybimiz bo‘ladi. Shuning uchun, ayol qayerdan bo‘lishidan qatʼi nazar, u bizning Toshkent shahrida yashayotgan bo‘lsa ham, farqi yo‘q. Agar biz unga imkoniyat yaratib, uni bu yo‘lga chorlasak, bu bizning xatomiz bo‘ladi, dedi tuman oila va xotin-qizlar bo‘limi boshlig‘i Iroda Abdullayeva.
Masʼulning aytishicha, tumandagi ko‘p qavatli uylar, jumladan, yangi qurilgan ko‘p qavatli uylardagi ijaraga berilgan xonadonlar doimo nazorat qilib boriladi.
Mahallalarimizda bu yo‘nalishda juda katta tizim yo‘lga qo‘yilgan. Yaʼni, ijaraga beriladigan xonadonlar nazoratda bo‘ladi va doimiy ravishda kuzatiladi. Chunki har bir mahallamiz shaxmat tarzida tuzilgan, yaʼni, doimiy yashaydigan aholimiz bilan aloqa qilib turiladi. Bizda ko‘plab uylar qurilayotganligi uchun kelib ketuvchilar ko‘p. Kirib chiqishimiz juda ham ko‘p, bozor yaqinligi sababli, masalan, ippodrom, bozorchilar ham xarid qilish uchun kelishadi. Biz sharoit yaratib bermasligimiz kerak, deydi u.
Toshkent shahar IIBB 2024-yilning aprel oyida o‘sha yilning dastlabki uch oydida fohishalik bilan shug‘ullanganlar haqida axborot berib, Toshkentda fohishalik bilan shug‘ullangan 1068 nafar shaxsning 92,8 foizi yaʼni 992 nafari viloyatlardan kelib, bu turdagi huquqbuzarlikni sodir etgan ayollar ekaniga urg‘u bergandi.
Izoh (0)