Gruziya bosh vaziri Irakli Kobaxidze 4-mart kuni rasmiy tashrif bilan O‘zbekistonga keldi.
Uni Toshkent xalqaro aeroportida bosh vaziri Abdulla Aripov va boshqa rasmiylar kutib oldi.
Tashrif dasturidan qator ikki tomonlama uchrashuvlar va hukumatlararo qo‘shma komissiya yig‘ilishini o‘tkazish, sanoat korxonalari faoliyati bilan tanishish va boshqalar o‘rin olgani haqida avval xabar qilingan edi.
2022-yilning iyulida o‘sha vaqtdagi Gruziya bosh vaziri Irakliy Garibashvili boshchiligidagi hukumat delegatsiyasi Toshkentga kelgandi. Tashrif chog‘ida Irakliy Garibashvili prezident Shavkat Mirziyoyev qabulida bo‘lib, ikki tomonlama amaliy hamkorlikni yanada kengaytirishga kelishib olingandi. 2023-yilning iyulida esa O‘zbekiston bosh vaziri Abdulla Aripov boshchiligidagi delegatsiya 17—18-iyul kunlari Tbilisida bo‘lib, Gruziya hukumati bilan muzokaralar o‘tkazgan edi.
O‘zbekistonga bundan avval Shavkat Mirziyoyevning taklifiga binoan Pokiston bosh vaziri Shahboz Sharif rasmiy tashrif buyurgandi. 25—26-fevral kunlari bo‘lib o‘tgan tashrif davomida tor doirada va rasmiy delegatsiyalar ishtirokida muzokaralar o‘tkazildi. Uning yakunida Shavkat Mirziyoyev va Pokiston bosh vaziri Shahboz Sharif ko‘p qirrali O‘zbekiston—Pokiston hamkorligini yanada rivojlantirish va mustahkamlashga qaratilgan qo‘shma deklaratsiya hamda ikki tomonlama Oliy darajadagi strategik sheriklik kengashini tuzish to‘g‘risidagi bayonnoma va ikki tomonlama bitimlarning salmoqli to‘plami imzolandi.
O‘zbekiston prezidenti uchrashuvlar samarali bo‘lganini alohida qayd etib, ushbu tarixiy tashrif O‘zbekiston—Pokiston strategik sherikligida yangi sahifa ochishini ta’kidladi.
Izoh (0)