Toshkent shahrining Qorasuv-4 mavzesida joylashgan 9 qavatli uyda sodir bo‘lgan gaz portlashidan so‘ng yana yong‘in chiqqani haqida xabarlar va tunda olingan yong‘in videotasvirlari tarqaldi. Poytaxt FVB bunga munosabat bildirdi.
Unda aytilishicha, voqea sodir bo‘lgan xonadon va qo‘shni xonadonlarda bitta yong‘in qutqaruv ekipaji yong‘in tahlil ishlarini amalga oshirilayotgan vaqtda qutqaruvchilar tomonidan alanga aniqlanib, o‘z vaqtida bartaraf etilgan. Aytilgan manzilda xonadonlarda yong‘in sodir bo‘lmagan va boshqa xonadonlarga tarqalib ketmagan.
Qorasuv-4 mavzesidagi yong‘in
1-mart kuni soat 15:23 da Toshkent shahar FVBga Mirzo Ulug‘bek tumani, Qorasuv-4 mavzesida joylashgan ko‘p qavatli uylarning biridagi xonadonda chaqnashi sodir bo‘lgani to‘g‘risida xabar kelib tushgan. Yong‘in soat 16:07 o‘chirilgan. 6 nafar fuqaro qutqarilib tez tibbiy yordam xizmatiga topshirilgan.
Voqea oqibatida jabrlanganlar orasida ikki nafar bola jarohat olgan. Ulardan biri shifoxonaga olib ketilayotganda vafot etgan.
Yong‘in sodir bo‘lgan xonadonda fuqaro oshxonada gaz plitasini yoqish orqali o‘z joniga qasd qilishga uringan, natijada gaz havo aralashmasi chaqnashi sodir bo‘lib yong‘in kelib chiqqandan so‘ng ushbu fuqaro 9-qavatdan o‘zini tashlash orqali halok bo‘lgan.
Hodisa sodir bo‘lgan ko‘p qavatli uyda qo‘shni xonadonlar ham zarar ko‘rgan. Shahar va Mirzo Ulug‘bek tumani hokimliklari tomonidan ularning xavfsizligi va qulay sharoitlarini ta’minlash maqsadida oila a’zolari bilan birga mehmonxonaga vaqtincha joylashtirish choralari ko‘rilgan.
Izoh (0)