Toshkent shahar Mirzo Ulug‘bek tumanida ko‘p qavatli uylarning biridagi xonadonda chaqnash sodir bo‘lgani xabar qilingandi. Poytaxt hokimligi hodisada bir bola vafot etganini ma’lum qildi.
Unda aytilishicha, voqea oqibatida bir necha kishi, jumladan, ikki nafar bola jarohat oldi. Afsuski, bir bola shifoxonaga olib ketilayotganda vafot etdi, ikkinchisi shifokorlar nazorati ostida. Barcha jabrlanganlar tez tibbiy yordam xodimlariga topshirildi.
Hozirda voqea joyida turar joy binosining hayot faoliyatini tiklash ishlari olib borilmoqda.
Voqea haqida batafsil
1-mart kuni soat 15:23 da Toshkent shahar FVBga Mirzo Ulug‘bek tumani, Qorasuv-4 mavzesida joylashgan ko‘p qavatli uylarning biridagi xonadonda chaqnash sodir bo‘lgani to‘g‘risida xabar tushgan. Aytilgan manzilga yong‘in-qutqaruv ekipajlari yetib borgan. Voqea joyiga FVB, IIBB, SSB, prokuratura va boshqa tegishli tashkilotlar xodimlari yetib borgan.
Yong‘in-qutqaruv ekipajlari soat 15:29 da yetib borganida 9 qavatli uyning 9-qavatidagi xonadonda chaqnash natijasida yong‘in sodir bo‘lgani aniqlangan. Yong‘in soat 16:07 da o‘chirilgan.
Manzilda 6 nafar fuqaro qutqarilib tez tibbiy yordam xizmatiga topshilgan.
Mazkur holat yuzasidan birlamchi ma’lumotlarga qaraganda, yong‘in sodir bo‘lgan xonadonda fuqaro oshxonada gaz plitasini yoqish orqali o‘z joniga qasd qilishga uringan. Natijada gaz havo aralashmasi chaqnashi sodir bo‘lib yong‘in kelib chiqqandan so‘ng ushbu fuqaro 9-qavatdan o‘zini tashlash orqali halok bo‘lgani aniqlandi.
Hodisa sodir bo‘lgan ko‘p qavatli uyda qo‘shni xonadonlar ham zarar ko‘rgani aniqlandi. Hozirda shahar va Mirzo Ulug‘bek tumani hokimliklari tomonidan ularning xavfsizligi va qulay sharoitlarini ta’minlash maqsadida oila a’zolari bilan birga mehmonxonaga vaqtincha joylashtirish choralari ko‘rilmoqda.
Izoh (0)