Тошкент шаҳрининг Қорасув-4 мавзесида жойлашган 9 қаватли уйда содир бўлган газ портлашидан сўнг яна ёнғин чиққани ҳақида хабарлар ва тунда олинган ёнғин видеотасвирлари тарқалди. Пойтахт ФВБ бунга муносабат билдирди.
Унда айтилишича, воқеа содир бўлган хонадон ва қўшни хонадонларда битта ёнғин қутқарув экипажи ёнғин таҳлил ишларини амалга оширилаётган вақтда қутқарувчилар томонидан аланга аниқланиб, ўз вақтида бартараф этилган. Айтилган манзилда хонадонларда ёнғин содир бўлмаган ва бошқа хонадонларга тарқалиб кетмаган.
Қорасув-4 мавзесидаги ёнғин
1 март куни соат 15:23 да Тошкент шаҳар ФВБга Мирзо Улуғбек тумани, Қорасув-4 мавзесида жойлашган кўп қаватли уйларнинг биридаги хонадонда чақнаши содир бўлгани тўғрисида хабар келиб тушган. Ёнғин соат 16:07 ўчирилган. 6 нафар фуқаро қутқарилиб тез тиббий ёрдам хизматига топширилган.
Воқеа оқибатида жабрланганлар орасида икки нафар бола жароҳат олган. Улардан бири шифохонага олиб кетилаётганда вафот этган.
Ёнғин содир бўлган хонадонда фуқаро ошхонада газ плитасини ёқиш орқали ўз жонига қасд қилишга уринган, натижада газ ҳаво аралашмаси чақнаши содир бўлиб ёнғин келиб чиққандан сўнг ушбу фуқаро 9-қаватдан ўзини ташлаш орқали ҳалок бўлган.
Ҳодиса содир бўлган кўп қаватли уйда қўшни хонадонлар ҳам зарар кўрган. Шаҳар ва Мирзо Улуғбек тумани ҳокимликлари томонидан уларнинг хавфсизлиги ва қулай шароитларини таъминлаш мақсадида оила аъзолари билан бирга меҳмонхонага вақтинча жойлаштириш чоралари кўрилган.
Изоҳ (0)