“O‘zgidromet” dam olish kunlari uchun ob-havo prognozini e’lon qildi.
Unga ko‘ra, 1-mart, shanba kuni respublika hududining katta qismida yog‘ingarchilik kutilmaydi, faqat Qoraqalpog‘iston Respublikasi va Xorazm viloyatida baʼzi joylarda yog‘ingarchilik (yomg‘ir, qor) bo‘ladi.
2-mart, yakshanba kuni respublikaning ko‘pchilik viloyatlarida (Farg‘ona vodiysidan tashqari) yog‘ingarchilik bo‘ladi. Markaziy viloyatlarda va respublika janubida kunning ikkinchi yarmida yog‘ingarchilik bo‘lishi kutilmoqda.
Hududning katta qismida shanba va yakshanba kunlari havo harorati 2-3 darajaga ko‘tariladi, ammo hali ham meʼyoriy qiymatlardan past bo‘ladi.
Respublikaning shimoli-g‘arbiy va cho‘l hududlarida yana sovuq havo kirib kelishi hisobiga havo harorati asta-sekin pasayadi va Qoraqalpog‘iston Respublikasi, Xorazm viloyatida yakshanba kuni kechasi 7-12 daraja sovuqni, kunduzi 3 daraja sovuq-2 daraja iliqni, Buxoro, Navoiy viloyatlarida kechasi 2 daraja sovuq-3 daraja iliqni, kunduzi 0-5 iliqni tashkil etadi.
Respublikaning ayrim joylariga tuman tushishi mumkin. Shamol 7-12 metr/sekund tezlikda esadi, 2-mart kuni baʼzi joylarda 15-20 metr/sekundgacha kuchayadi.
Toshkentda 1—2-mart kunlari harorat 8-10 daraja iliq, kechalari 1 daraja sovuq-2 daraja iliq bo‘ladi. 2-mart kuni kechqurun yog‘ingarchilik bo‘lishi mumkin.
“O‘zgidromet” mart oyi uchun prognozini ham e’lon qilgandi. Unda oyning birinchi o‘n kunligida nisbatan sovuq havo bo‘lishi qayd etilgan.
Izoh (0)