Qozog‘iston prezidenti teleradiomajmuasi MDH mamlakatlari yetakchilarining Ostonada kengash yig‘ilishiga yetib kelishi aks etgan videoni e’lon qildi.
Unda Ozarbayjon prezidenti Ilhom Aliyev Maybach 62S yoki uning Maybach Guard nomli zirhli versiyasida kelganini ko‘rish mumkin.
Maybach 62 S premium avtomobili birinchi marta 2006-yilda Pekindagi avtosalonda namoyish etilgandi. U 550 ot kuchiga teng dvigatel bilan jihozlangan.
Rossiya prezidenti Vladimir Putin Aurus Senat limuzinida keldi. Uzaytirilgan Aurus Senat kuzovi va oynasi fuqarolik mashinalari uchun maksimal bo‘lgan VR10 standarti bo‘yicha zirhlangan.
“Prezident bilan birga uning o‘z avtomobillari ham olib yuriladi, bu masala shu bilan bog‘liqki, ular strategik aloqa bilan jihozlangan, ular barcha zarur xavfsizlik mezonlariga javob beradi, shuning uchun prezident Federal soqchilik xizmati tomonidan ishlatiladigan avtomobillardan foydalanadi”, — deya izoh bergan edi avvalroq Rossiya prezidenti matbuot kotibi Dmitriy Peskov.
Armaniston bosh vaziri, shuningdek, Turkmaniston, O‘zbekiston, Qirg‘iziston, Tojikiston va Belarus prezidentlari S-klassiga taalluqli Mercedes-Benz Maybach avtomobilining turli versiyalarida yetib kelganini ko‘rish mumkin.
Lyuks avtomobil 2017-yil aprelida Shanxaydagi avtomobil ko‘rgazmasida ommaga havola etilgandi.
Shu hafta Ostonada turli mamlakatlar davlat rahbarlari va vakillari ishtirokida xalqaro sammitlar bo‘lib o‘tmoqda. Shu jumladan, Osiyoda hamkorlik va ishonch choralari kengashi sammiti, MDH Davlat rahbarlari kengashi majlisi, “Markaziy Osiyo — Rossiya” sammiti o‘tkazilmoqda.
Izoh (0)