Turkmaniston birinchi marta Rossiyada ishlab chiqariladigan Aurus Senat Limousine zirhli avtomobilini sotib oldi, deb yozadi “Xronika Turkmenistana”. Mamlakat prezidenti 10-iyun kuni Rossiyaga tashrifi chog‘ida aynan shu mashinada harakatlandi. Bu haqda “TASS” Turkmaniston hukumatiga yaqin manbasiga tayanib xabar bergan.
“Ushbu turdagi avtomobil dunyoda eng baland ballistik himoya darajasiga ega va eng xavfsiz transport vositasi hisoblanadi”, — deydi manba.
2019-yil avgustida Rossiya bosh vaziri Dmitriy Medvedev birinchi Kaspiy iqtisodiy forumida qatnashish uchun Turkmanboshi shahriga tashrifi chog‘ida prezident Gurbanguli Berdimuhamedovga Rossiyaning Aurus avtomobillari lineykasini sotgan edi.
O‘shanda katta Berdimuhamedov Rossiya premium avtomobillarining butun lineykasini sotib olishga tayyorligini bildirgandi.
OAVlar Berdimuhamedov avtomobilga qiziqish bildirib, uning rangiga va radiator hajmiga e’tibor qaratgani va mashinadan issiq iqlimda foydalanish imkoniyati bo‘lishi kerakligini aytgani haqida yozgandi.
“Rangini bilamiz, oq bo‘lishi kerak”, — degan edi Medvedev tabassum bilan. “Agar talabnoma berish kerak bo‘lsa, beramiz”, — degan Turkmaniston rahbari. “Gaplaringizning o‘zini talabnoma deb hisoblaymiz”, — deb javob bergan Rossiya bosh vaziri.
O‘sha yilning oktabrida Aurus avtomobillari xaridini prezident Gurbanguli Berdimuhamedov Rossiya prezidenti Vladimir Putin bilan uning Ashxobodga tashrifi chog‘ida muhokama qilgan edi.
“Biz Aurus avtomobiliga talabnoma berdik. Birinchi partiyani sotib olishni istardik”, — degan o‘shanda Turkmaniston rahbari. Biroq o‘shandan buyon oldi-sotdi haqida xabar berilmagan edi.
Izoh (0)