Rossiya prezidenti Vladimir Putin Turkmaniston sobiq prezidenti Gurbanguli Berdimuhamedovga IV darajali “Vatan oldidagi xizmatlari uchun” ordenini topshirdi. Bu haqda Kreml saytida xabar beriladi.
“Sizning rahbarligingiz ostida o‘tgan yillarda birgalikda erishgan natijalarimizdan juda faxrlanamiz. Ta’kidlashim kerakki, siz munosabatlarimiz rivojlanishiga juda yaxshi turtki berdingiz, va bu dinamika yangi prezident kelganidan keyin ham pasaymayapti… Bu juda yuksak mukofot, u siz tomoningizdan davlatlararo munosabatlarimizga qo‘shilgan hissaga to‘liq mos keladi”, — dedi Putin.
Sobiq prezident rossiyalik hamkasbiga minnatdorlik bildirdi va davlat rahbari Serdar Berdimuhamedovning “eng iliq so‘zlari, ezgu tilaklari”ni yetkazdi.
Putin Berdimuhamedovni IV darajali “Vatan oldidagi xizmatlari uchun” ordeni bilan taqdirlash to‘g‘risidagi farmonni avgust oxirida imzolagan edi.
1-noyabr kuni Rossiyaga tashrifi chog‘ida Berdimuhamedov Federatsiya kengashi va Xalq maslahati (Turkmaniston parlamenti yuqori palatasi) hamkorligi bo‘yicha parlamentlararo komissiya tuzish to‘g‘risidagi bitimni Federatsiya kengashi raisi Valentina Matviyenko bilan birga imzoladi.
Gurbanguli Berdimuhamedov 2007-yilda, davlatning birinchi rahbari Saparmurat Niyazovning vafotidan keyin Turkmaniston prezidentiga aylangan edi. Berdimuhamedov hukmronligi davrida mamlakatda uning shaxsiga sig‘inish yuzaga keldi, uning o‘zi esa “Arkadag‘” (“Katta tayanch”, “Ortimizda turgan tog‘”) degan rasmiy nomga ega bo‘ldi.
Berdimuhamedov 2022-yil boshida prezident lavozimini muddatidan oldin tark etdi va buni “yoshlarga yo‘l berish” zarurligi bilan izohladi. Mamlakatning yangi prezidenti etib uning o‘g‘li Serdar Berdimuhamedov saylandi.
May oyida Rossiya prezidenti Vladimir Putin Turkmaniston rahbari Serdar Berdimuhamedovni “Rossiya va Turkmaniston o‘rtasidagi strategik sheriklikni mustahkamlashga qo‘shgan katta hissasi uchun” Do‘stlik ordeni bilan taqdirlagan edi.
2017-yilda xuddi shunday sabab bilan — “Rossiya va Turkmaniston o‘rtasidagi strategik sheriklikni mustahkamlashga qo‘shgan katta hissasi uchun” Putin o‘sha vaqtdagi Turkmaniston prezidenti Gurbanguli Berdimuhamedovni ham taqdirlagandi. Ammo katta Berdimuhamedovga Do‘stlik ordeni emas, balki Aleksandr Nevskiy ordeni berilgan.
Izoh (0)