AQSH Turkmanistonga Rossiyaga qarshi sanksiyalardan foyda ko‘rishda yordam bermoqchi

AQSH Turkmaniston hukumatiga va mahalliy biznesga Rossiyaga qarshi sanksiyalardan foyda ko‘rishda yordam bermoqchi. Bu haqda AQSH davlat kotibining Janubiy va Markaziy Osiyo ishlari bo‘yicha yordamchisi Donald Lu Ashxobodga tashrifi chog‘ida ma’lum qildi, deb yozadi “RBK”.

“Biz Turkmaniston hukumati va ishbilarmon doiralari bilan ishlab, ularga sanksiya rejimidan o‘zlari uchun ko‘proq foyda olishda yordam berishdan xursand bo‘lamiz”, — dedi u brifing chog‘ida.

Uning ta’kidlashicha, Turkmaniston iqtisodiyoti uchun xavflar “juda kam”, chunki Ashxobod Moskva bilan mudofaa sohasida katta hamkorligi yo‘q, shuningdek, mamlakatning rossiyalik oligarxlar bilan jiddiy aloqalari ham yo‘q. Qiyinchiliklarga duch kelishi mumkin bo‘lgan yagona soha — Rossiya orqali bank operatsiyalari, dedi Lu.

AQSH davlat kotibi yordamchisi eslatishicha, Qozog‘istondagi eng yirik Rossiya banklari qozog‘istonlik mulkdorlarga sotilgan. “Qozog‘istondagi Alfa Bank va Sberbank endi Qozog‘iston banklari hisoblanadi, ya’ni qozog‘istonlik biznesmenlar rossiyalik biznesmenlarga tegishli bo‘lgan banklarni sotib olish orqali foyda ko‘rdi”, — deya aniqlik kiritdi u.

Ukrainada maxsus operatsiya boshlagach, G‘arb mamlakatlari Rossiyaga qarshi qat’iy sanksiyalar kiritdi. Rossiya hukumati sanksiyalar Moskvadan ko‘ra, ularni joriy qilayotganlarga ko‘proq zarar keltirishi haqida ko‘p bora aytgan.

Xususan, oktabr oxirida Rossiya prezidenti Vladimir Putin rossiyalik ekspertlarga tayanib, sanksiyalar bilan bog‘liq qiyinchiliklarning avj nuqtasidan o‘tilganini va mamlakat, umuman olganda, yangi sharoitlarga moslashganini ma’lum qildi. Endi Rossiya iqtisodiyoti yanada mustahkamroq, yanada suverenroq platformada rivojlanadi, dedi u.

Iyun o‘rtalarida Putin Turkmaniston prezidenti Serdar Berdimuhamedov bilan ikki mamlakat strategik sherikligini chuqurlashtirish haqida deklaratsiya imzolagan edi.

Hujjatda siyosiy, savdo-investitsiyaviy, madaniy-gumanitar, biologik va axborot xavfsizligi, huquqiy, transport va energetika sohalaridagi hamkorlikning ustuvor jihatlari qayd etilgan.