29-iyun kuni Ashxobodda Kaspiybo‘yi davlatlari rahbarlarining VI sammiti bo‘lib o‘tdi. Tadbirda ishtirok etish uchun Turkmanistonga Rossiya prezidenti Vladimir Putin, Ozarbayjon prezidenti Ilhom Aliyev, Qozog‘iston rahbari Qosim-Jo‘mart To‘qayev va Eron rahbari Ibrohim Raisiy keldi.
Mehmonlar Turkmaniston prezidenti Serdar Berdimuhamedov va shu kuni tavalludining 65 yilligini nishonlayotgan uning otasi, sobiq prezident, parlament yuqori palatasining amaldagi raisi Gurbanguli Berdimuhamedov bilan uchrashdi.
Tomonlar turli sohalardagi hamkorlik muvaffaqiyatlari haqida umumiy iboralar bilan almashdilar.
“TASS” axborot agentligining xabar berishicha, Putinni aeroportda Turkmaniston tashqi ishlar vaziri Rashid Meredov kutib olgan. Rossiya prezidenti sammit maydoniga Rossiya bayrog‘i o‘rnatilgan qora “Aurus”da borgan.
Ikki hafta oldin Turkmaniston Rossiyada ishlab chiqarilgan ilk oq rangli Aurus Senat Limousine zirhli mashinasini sotib olgani xabar qilingan edi. Serdar Berdimuhamedov 10-iyun kuni Rossiyaga tashrifi chog‘ida aynan shu avtomobildan foydalangan.
“RBK” nashrining xabar berishicha, yubiley sharafiga Putin Gurbanguli Berdimuhamedovga ikkita qilich, shaxmat to‘plami hamda ot ustidagi chavandoz haykalini sovg‘a qilgan.
Rossiya rahbari matbuot kotibi Dmitriy Peskovning so‘zlariga ko‘ra, shaxmat zlatoustlik ustalar tomonidan, “Qaytib kelayotgan chavandoz” haykali esa mashhur peterburglik haykaltarosh Lanserening nevarasi tomonidan yaratilgan. Peskov qilichlar haqida gapirar ekan, ulardan biri eski, ikkinchisi yangi ekanini aytdi.
Qozog‘iston rahbari To‘qayev Gurbanguli Berdimuhamedovni “Qozog‘iston—Turkmaniston munosabatlarini mustahkamlashga qo‘shgan salmoqli hissasi uchun” Qozog‘iston Respublikasining oliy davlat mukofoti – “Oltin Qiran” ordeni bilan taqdirladi.
29-iyun kuni Shavkat Mirziyoyev Gurbanguli Berdimuhamedov bilan telefon orqali muloqot qilgan. Suhbat avvalida davlat rahbari Gurbanguli Berdimuhamedovni 65 yoshga to‘lgani bilan samimiy qutlab, unga mustahkam sog‘lik, baxt-saodat va muvaffaqiyatlar, birodar Turkmaniston xalqiga tinchlik-osoyishtalik va ravnaq tilagan.
Izoh (0)