Putin va Baydenning birinchi uchrashuvi. Asosiy ma’lumotlar

Jenevada 16-iyun kuni Rossiya prezidenti Vladimir Putin hamda AQSh davlat rahbari Jo Baydenning uchrashuvi bo‘lib o‘tdi. “RBK” nashri mazkur uchrashuvga aloqador asosiy ma’lumotlarni taqdim etgan.

Uchrashuv yakunlari haqidaMuzokaralardan keyin Vladimir Putin va Jo Bayden avval taxmin qilinganidek birgalikda qo‘shma matbuot anjumani o‘tkazmaslikka qaror qildi.

Jurnalistlar oldiga birinchi bo‘lib Putin chiqdi va quyidagi mazmunda bayonot berdi:Rossiya va AQSh mos ravishda Moskva hamda Vashingtonga o‘z elchilarini qaytaradi (Rossiya elchisi mart oyida Moskvaga maslahatlashuvlar uchun qaytib kelgan, AQSh elchisi Jon Sallivan esa aprel oyida Vashingtonga ketgandi).

Mamlakatlar o‘rtasidagi munosabatlarda noaniqliklar ko‘p, lekin tomonlar ushbu yo‘nalishlardagi masalalarga yechim topishga harakat qiladi.

Shuningdek, Putinning fikricha muzokaralarda ikki tomon o‘rtasida o‘zaro dushmanlik kayfiyati hukm surmagan.

Ikki mamlakatdagi rossiyalik va amerikalik mahbuslar borasida: “Muayyan yo‘nalishlarda kelishuvlar bo‘lishi mumkin. Rossiya TIV hamda AQSh davlat departamenti mazkur yo‘nalishdagi ishlarni davom ettiradi”, — degan Putin.

Keskin bayonotlar, xususan, mart oyida ABC News jurnalistining Jo Baydenga “Putinni qotil deb hisoblaysizmi?” deya bergan savoliga, o‘ylanib turib, “Haaa”, – deya javob qaytargani bo‘yicha Putin quyidagi fikrlarni bildirgan: “Hammamiz mazkur bayonotlar haqida bilamiz, o‘sha gaplardan keyin Bayden menga qo‘ng‘iroq qilgan va bu borada o‘zara tushuntirishlar berganmiz, suhbat davomida men uni tushunganman. U uchrashib olishni taklif qilgan. Men prezident Baydenning juda tajribali inson ekaniga yana bir marta ishonch hosil qildim. Biz u bilan qariyb ikki soat yuzma-yuz gaplashdik. Undan avvalgi prezident mazkur masaladan o‘zini olib qochgandi, lekin amaldagi prezident chaqiruvga rad javobini bermadi. Umuman olganda ikki mamlakatda bo‘layotgan voqea-hodisalar uchun siyosiy boshqaruv mas’uliyatni o‘z zimmasiga oladi. AQShda har kuni kimnidir o‘ldirib ketishadi. So‘zingni aytib ulgurmasingdan ko‘ksingga yoki ortdan turib o‘q uzishadi”.

Aleksey Navalniy haqida.“U hammasini anglab, tushunib turib, hibsga olinishiga sabab bo‘ladigan ishlarni qilishda davom etgan. O‘zi istagan ishni qilgan. Afsuski, matbuot-anjumani formati bu haqda batafsil gapirish imkonini bermaydi. Menimcha bu haqda hech qanday murakkab gap ayta olmayman”.

Rossiya hamda AQSh o‘rtasidagi ishonch va o‘zaro munosabatlar xususida.

“Lev Tolstoy qachonlardir hayotda baxt yo‘qligi, balki uning uchquni borligi haqida gapirgan va mazkur uchqunni asrashga chaqirgandi. Menimcha o‘sha uchqunlar namoyon bo‘lishni, chaqnashni boshladi”.

G‘arb uchun Rossiya harakatlarining oldindan bilish imkoniyatlari haqida.

“Hammamiz o‘zimizga qarshi tahdidlar bilan kurashda eng to‘g‘ri deb hisoblagan yo‘limizni tanlaymiz. Hatti-harakatlarning qoidalari borasida kelishib olish shart”.

CNN’ning xabar berishicha, Bayden va uning yordamchilari Putin ishtirokidagi brifingni diqqat bilan kuzatgan.

“Putin bilan uchrashuv muhiti yaxshi va ijobiy bo‘ldi”, – deya ta’kidlagan Bayden. Uning fikricha, Putin sovuq urush tarafdori emas. Prezidentlar nimalarnidir kelishib olgani yoki aksincha kelisha olmagani bo‘yicha xulosalarni yarim yildan keyin chiqarish mumkin.

Biznes yuritish va Rossiya iqtisodiyotidagi investitsiyalar haqida.

Bayden Putinga tadbirkor Maykl Kalvini ozodlikka chiqarishni taklif qildi. “Amerikalik biznesmenlar Rossiyaga investitsiya kiritishini istasangiz uni ozodlikka chiqaring va vaziyat dinamikasini o‘zgartiring”, – degan Bayden.

U Rossiya bilan savdo aloqalarini olib borishda muammo yo‘qligi, biroq mamlakat xalqaro me’yorlarga rioya etishi lozimligini qayd etgan. Baring Vostok investitsiya fondi asoschisi Maykl Kalvi 2019-yilda hibsga olingan va unga nisbatan firibgarlik, rastrata yo‘li bilan pullarni talon-toroj qilish ayblovi qo‘yilgan. 2020-yil noyabrda unga qo‘yilgan ayblov uy qamog‘i bilan almashtirilgan, hozirda muayyan shartlar asosida ozodlikni cheklash jazosi belgilangan.

Kiberhujumlar haqida.Bayden kiberhujumlar o‘ta muhim infratuzilmalarga qaratilmasligi kerakligini bildirdi.

“Biz qanday asosiy maqsadlar kiberhujumlar ta’siridan holi bo‘lishi haqida kelishib oldik”, – degan Bayden.

Biroq Bayden agar kelishuvlar shartlari buzilsa, AQSh holatlarga javob harakatlarini amalga oshirishni va’da qilgan.

Uchrashuv qanday o‘tdi?Uchrashuv Toshkent vaqti bilan taxminan 16:30 da boshlangan va deyarli to‘rt soat davom etgan. Uchrashuvning birinchi qismi tor doirada o‘tgan va unda prezidentlardan tashqari Rossiya TIV rahbari Sergey Lavrov va AQSh davlat kotibi Entoni Blinken qatnashgan, uchrashuvning ikkinchi qismida ikki mamlakat vakillarining soni ancha ko‘paygan.

Putin bir yarim yil ichidagi birinchi xalqaro tashrifda hammasining vaqtida bo‘lishiga e’tibor qaratdi, belgilangan muddatda, sammit boshlangunigacha yetib keldi. Jo Bayden esa Jenevaga Bryusseldan keldi va “Interkontinental” deb nomlangan mahalliy mehmonxonada tunni o‘tkazdi.

Muzokaralar bo‘lib o‘tgan La Grange villasidagi yo‘lakka birinchi bo‘lib Vladimir Putinning Aurus limuzinlari yetib keldi. Undan keyin qariyb 15 daqiqa o‘tgach, Bayden ham manzilga kelgan. Villada ikki prezidentni Shveysariya yetakchisi Gi Parmelen kutib olgan. Bayden birinchi bo‘lib muzokaralar o‘tadigan binoga kirgan, keyin Parmelen va Putin bilan bino qanotiga chiqqan. Shveysariya prezidenti mehmonlarga omad tilagan va ular muzokaralar zaliga kirib, uchrashuvni boshlagan. Putin Baydenga uchrashuv tashabbusi uchun minnatdorlik bildirgan. “Avval aytib o‘tganimdek, hamisha yuzma-yuz gaplashib olish eng to‘g‘ri qaror bo‘ladi”, — deya qayd etgan Bayden.

Prezidentlar suhbati Jenevadagi eng yaxshi kitoblar kolleksiyasiga ega kutubxonada boshlangan, u yerda XV asrda nashr qilingan kitoblar ham mavjud. Prezidentlarning kutubxonada kitob varaqlashga vaqti bo‘lmagani aniq, ular ikki mamlakat o‘rtasidagi munosabatlar tarixdagi eng yomon holatga tushib borayotganini tan olgan.