Putin Stalingrad jangini nishonlashga “yadro chamadoni” bilan keldi — OAV (foto)

Rossiya prezidenti Vladimir Putin Stalingrad jangining 80 yilligi nishonlash uchun Volgograd shahriga tashrifida “yadro chamadoni” bilan keldi. Bu haqda The Mirror nashri xabar berdi.

Nashr Putining yonidagi yordamchilari qoʻlidagi ikkita qora chamadonga eʼtibor qaratgan, ulardan biri, kuzatuvchilarga koʻra, ehtimoliy suiqasddan himoya qilish uchun qalqon hisoblanadi. Ukrainadagi urush davom etar ekan, soʻnggi bir yil davomida Putin atrofida chamadon koʻtargan qoʻriqchilar koʻpaygani aytiladi.

Putin Volgagraddagi Ikkinchi jahon urushida halok boʻlgan sovet askarlari yodgorligiga zirhli Aurus limuzinida 25 ta mashinadan iborat kortej, shu jumladan, tez yordam mashinasi hamrohligida kelgani ma’lum qilingan. 

“Yon atrofga snayperlar joylashtirilgan, Volgograd viloyati gubernatori Andrey Bocharov Putin bilan uchrashishdan oldin toʻqqiz kunlik karantinni oʻtagan. Rossiya prezidenti kelishi kerak boʻlgan hududda yashovchi mahalliy aholiga dam olish e’lon qilingan”, — deyiladi xabarda.

The Mirror nashri Rossiya rahbari oʻz xalqining qashshoqligini koʻrmasligi uchun koʻchalarda daydi itlar ushlangani, vayronagarchilikka uchragan uylar buzib tashlangani haqida xabar berdi.

Avvalroq Rossiya prezidenti Stalingrad jangining 80 yilligiga bag‘ishlangan konsertdagi chiqishida Gʻarb davlatlari Ukrainaga tanklar yuborishiga munosabat bildirib, G‘arbga javob qaytarilishidan ogohlantirgandi.