Samolyot uchuvchisi kasbi jiddiy bilimni, shuningdek, maʼlum shaxsiy xususiyatlarni talab qiladi, chunki uchuvchilar murakkab va oldindan aytib bo‘lmaydigan vaziyatlarda qaror qabul qila olishi lozim. Quyida ushbu masʼuliyatli kasb haqida bir nechta faktlarni keltiramiz.
Uchuvchi bilishi shart:
- har qanday parvoz imkon qadar xavfsiz bo‘lishi uchun kapitan parvozdan oldin, parvoz paytida va undan keyin muayyan harakatlar rejasini bajarishi kerak;
- uchuvchi va barcha ekipaj aʼzolari suzishni bilishi shart. Suvga majburiy qo‘nish bilan bog‘liq favqulodda vaziyat yuzaga kelganda, ekipaj yo‘lovchilarni tezda evakuatsiya qilishi va qutqaruv xizmati kelguniga qadar yo‘lovchilar xavfsizligini taʼminlashi lozim;
- uchuvchilar tibbiy yordam ko‘rsatishi uchun muntazam tibbiy malakani oshiradilar. Bundan tashqari, ular samolyot bortida tibbiy asbob-uskunalardan foydalanish qoidalarini bilishlari shart;
- parvoz qilishdan avval uchuvchilar shamol tezligi va yo‘nalishini, tumanni hisobga olishlari, shuningdek, yuzaga kelishi mumkin bo‘lgan xavfni oldindan ayta olishlari kerak.
Uchuvchilarning shaxsiy xavfsizligi:
- uchuvchilar parvoz vaqtida navbatma-navbat uxlashi mumkin. Bu parvoz xavfsizligini taʼminlash va charchoq tufayli yuzaga kelishi mumkin bo‘lgan xatarning oldini oladi;
- uchuvchilar bir-biriga yegulik ulashishi taqiqlanadi. Zaharlanishning oldini olish maqsadida uchuvchilarga turli xildagi ovqatlar beriladi;
- spirtli ichimliklar ichish man etiladi. Uchuvchilarga uchishdan 12 soat oldin tarkibida alkogol bor ichimliklarni isteʼmol qilish man etiladi;
- uchuvchi kislorod yetishmasligidan hushini yo‘qotsa-chi? Gipoksiya – yaʼni kislorod tanqisligi uchuvchilar va boshqa ekipaj aʼzolarida kamdan-kam uchraydigan, ammo nihoyatda xavfli hodisa. Bunga yo‘l qo‘ymaslik uchun samolyot borti qo‘shimcha havo jihozlari bilan taʼminlangan bo‘ladi.
Izoh (0)