Madridning “Real” klubi bosh murabbiyi Karlo Anchelotti 2024—2025-yilgi mavsumdan joriy etilgan Chempionlar Ligasi yangi formati haqida fikr bildirdi.
“Yangi format? O‘yinlar juda ko‘p o‘tkazildi. Biz yangi uchrashuvlarni qo‘shish emas, balki ayrimlarini qisqartirishimiz kerak. Bu format menga yoqadimi yoki yo‘q — buning ahamiyati yo‘q, chunki juda ham ko‘p uchrashuv o‘tkazish kerak. Chempionlar Ligasidagi o‘zgarishlarni qabul qilib, davom etish lozim”, dedi Anchelotti Marca nashriga.
Chempionlar Ligasi guruh bosqichi natijalariga ko‘ra, “Real Madrid” 11-o‘rinda yakunlab, 1/8 finalga to‘g‘ridan-to‘g‘ri yo‘llanma ololmadi. Shu sababli Anchelotti shogirdlari pley-offning saralash bosqichida “Seltik” yoki “Manchester Siti” bilan to‘qnash keladi. UEFA Chempionlar Ligasi pley-off qur’asi 31-yanvar kuni bo‘lib o‘tadi.
Ma’lumot uchun, umumiy bosqichning so‘nggi turida Anchelotti shogirdlari Fransiyaning “Brest” klubi bilan to‘qnash keldi. Kecha, 29-yanvar kuni bo‘lib o‘tgan uchrashuvda “Real” mehmonda Rodrigoning dubli va Bellingemning goli evaziga yirik 3:0 hisobida g‘alaba qozondi.
Izoh (0)