Мадриднинг “Реал” клуби бош мураббийи Карло Анчелотти 2024—2025 йилги мавсумдан жорий этилган Чемпионлар Лигаси янги формати ҳақида фикр билдирди.
“Янги формат? Ўйинлар жуда кўп ўтказилди. Биз янги учрашувларни қўшиш эмас, балки айримларини қисқартиришимиз керак. Бу формат менга ёқадими ёки йўқ — бунинг аҳамияти йўқ, чунки жуда ҳам кўп учрашув ўтказиш керак. Чемпионлар Лигасидаги ўзгаришларни қабул қилиб, давом этиш лозим”, деди Анчелотти Marca нашрига.
Чемпионлар Лигаси гуруҳ босқичи натижаларига кўра, “Реал Мадрид” 11-ўринда якунлаб, 1/8 финалга тўғридан-тўғри йўлланма ололмади. Шу сабабли Анчелотти шогирдлари плей-оффнинг саралаш босқичида “Селтик” ёки “Манчестер Сити” билан тўқнаш келади. УЕФА Чемпионлар Лигаси плей-офф қуръаси 31 январь куни бўлиб ўтади.
Маълумот учун, умумий босқичнинг сўнгги турида Анчелотти шогирдлари Франциянинг “Брест” клуби билан тўқнаш келди. Кеча, 29 январь куни бўлиб ўтган учрашувда “Реал” меҳмонда Родригонинг дубли ва Беллингемнинг голи эвазига йирик 3:0 ҳисобида ғалаба қозонди.
Изоҳ (0)