Odamzod o‘zi bilmagan holda jinoyatga qo‘l urishi, adashishi mumkin. Ammo u jinoyatni qayta-qayta sodir etsa, uni hech qanaqasiga oqlab bo‘lmaydi. “Nadomat” loyihasining navbatdagi qahramoni 36 yoshda, u 19 yildan buyon jazoni ijro etish muassasasida saqlanmoqda. Uning yoshlik yillari panjara ortida o‘tdi.
Mahkum — 37 yoshda. U 17 yoshida qotillik jinoyatini sodir etgan. 2009-yili afv etilib, ozodlikka chiqarilgan. Ammo o‘sha yilning o‘zidayoq ikkinchi qotillikka qo‘l urgan. 2009-yili 18 yilga ozodlikdan mahrum etilgan. Qilgan jinoyatlaridan tegishli xulosani chiqarmay, 2016-yili manzil koloniyadan qochib ketgan. 11 oylik qochqinlik davomida o‘zga fuqaroning 105 ming AQSH dollari miqdoridagi pulini o‘g‘irlagan.
— Oilada uchta farzandmiz, onam yolg‘iz o‘zi bizni tarbiyalab, voyaga yetkazgan. Birinchi jinoyatimni 17 yoshimda sodir etganman. O‘shanda sherigim bilan bir bolani do‘pposlaganmiz, afsuski, u olgan jarohati sabab vafot etgan.
Oilada uchta o‘g‘ilmiz, onam har doim o‘qishimiz kerakligini aytgan. Ammo feʼlimdagi urush-janjalga moyillik sabab ko‘p muammolarga kirib qolardim. Men 13 yilga, jinoiy sherigim esa 11 yilga ozodlikdan mahrum etilgan. U paytda bor-yo‘g‘i 17 yosh bo‘lganim uchun meni afv etishgan. 2009-yili ozodlikka chiqarilganman, ammo o‘sha yilning o‘zida bir inson bilan qattiq janjallashib, unga tesha yordamida jiddiy jarohat yetkazganman. U ham vafot etgan, jinoyatim uchun meni 18 yilga ozodlikdan mahrum etishgan.
-LKRM9sWS.jpg)
2016-yili manzil koloniyasiga chiqarilganman. U yerda paxta terimiga olib chiqishgan. Afsuski, kalta o‘ylab, u yerdan qochib, 11 oy mobaynida yashirinib yurganman. Qo‘shni mahallada sirena ovozi eshitilsa ham, yuragim taka-puka bo‘lardi. Qochqinlikda yashash osonmas, puldan qiynalganim uchun Toshkent viloyati Keles shaharchasidagi uylarning biriga o‘g‘irlikka tushganman. Xonadon egalarini avvaldan tanimaganman, jinoiy sherigim ham bo‘lmagan. Yarim tunda uyga kirib, 105 ming AQSH dollari miqdoridagi pulni o‘g‘irlaganman. Yashirinib, 5 ming dollarni o‘z ehtiyojim uchun ishlatganman. Ammo jinoyatni sodir etgan inson baribir qo‘lga tushadi, meni qo‘lga olib, jazoni ijro etish muassasasiga qaytarishgan. Qo‘shimchasiga oxirgi jinoyatim uchun 169-modda bilan yana sudlandim.
O‘ylab ko‘rsam, 17 yoshimdan buyon zona va manzil koloniyasida umrim o‘tadi. Yoshlik zavqini umuman his qilganim yo‘q, shu yoshgacha oila qurib, bitta farzandli ham bo‘lolmadim. Juda ko‘p narsalarni yo‘qotdim.
O‘ldirgan insonlarimni ko‘p eslayman, ular ham o‘zimizdek insonlar edi. Haligacha kechasi uyqum yo‘q, 2-3 gacha ko‘zim ilinmaydi. Ular xuddi yonimda yurgandek tuyulaveradi, deydi mahkum.
Videoni to‘liq ko‘rishni istasangiz, havola orqali YouTube’dagi “Daryo media” kanaliga tashrif buyuring.
Izoh (0)