“Nadomat” loyihasining navbatdagi qahramoni Toshkent viloyati Zangiota tumanida tug‘ilgan. U ayni kunda jazo muddatini Ohangaron shahridagi 44-son manzil koloniyasida o‘tamoqda. U suhbat davomida jinoyatidan pushaymon ekanligini aytib o‘tdi.
Mahkum — 33 yoshda. U Jinoyat kodeksining 97-moddasi 2-qismi bilan aybdor deb topilib, 18 yilga ozodlikdan mahrum etilgan. U tanish ayol bilan til biriktirib, uning turmush o‘rtog‘ini qasddan o‘ldirgan.
— Ayol kishining makriga uchib eng og‘ir gunohni sodir etdim. Yaʼni uning gapi bilan turmush o‘rtog‘ining qotiliga aylandim.
2015-yili u ayol bilan internet orqali tanishib qolganman. U turmush o‘rtog‘ining uch yil avval Qozog‘istonga ketgani va anchadan beri u va to‘rt bolasidan xabar olmayotgani haqida aytgandi. “Na telefon qiladi, umuman xabar olmaydi, hatto uning o‘lik yoki tirikligini ham bilmayman”, degandi. Ayol to‘y qilib qarzga kirib qolganini aytib, mendan yordam so‘radi. Mayli, qo‘limdan kelgancha yordam beraman, degandim. O‘sha vaqtda dalaga ekin-tekin ekardim, u yonimda yurib, kirlarimni yuvib, osh-ovqatimni qilib berardi. Shu tarzda kunlar o‘tdi va oradan bir yil o‘tib, farzandlari bilan tanishish uchun uyiga bordim. O‘shanda uning turmush o‘rtog‘i borligini bildim. “Nega meni aldading?” desam, “Dalaga borganda sizga hammasini tushuntiraman”, dedi. “U inson xo‘jako‘rsinga turmush o‘rtog‘im, u bilan aloqalar uzilgan”, dedi. Unga 10 sotix daladagi qulupnayni pishirib berish, ularni sotib qarzlaridan qutulishini aytdim. Faqat ortiq ko‘zimga ko‘rinma, deb taʼyinladim.
Oradan bir necha kun o‘tganidan keyin yarim kechasi uyga qaytayotganimda qo‘l telefonim jiringladi. “Men Husan akangizman, bo‘shab qo‘ng‘iroq qiling, zarur gapim bor”, dedi. Bilsam u tanish ayolning turmush o‘rtog‘i ekan. “Qabrlarni kelib suvab berolasizmi?” dedi. Yo‘q deyolmay, ertasi kuni To‘ytepaga bordim va u erkak bilan uchrashdim. Orada ayolning ota uyida ham qurilish qildim. Bir yilga yaqin uylariga qatnab, eski uyni buzib, uy soldim.
Shu orada ayol har doim “erimni o‘ldirib yuborish kerak”, deb ko‘p gapirardi. Bu taklif berilganida uch oy bu ishni qilolmay yurdim. Uyida ishlayotganimda u menga ko‘p gazlangan ichimlik olib kelardi. Shunga u bu narsa qo‘shganmi, deb shubha qilaman.
Bir kuni ishdan keyin eri bilan o‘tirib spirtli ichimlik ichdik. Keyin bir payt erkak o‘rnidan turib, o‘tin kesadigan motorli arrasini yoqib yelkamning yoniga olib keldi. “Husan aka, unday qilmang, oqibati yaxshi bo‘lmaydi”, dedim. Birozdan so‘ng u qo‘lidagini tushirib, ketdi. Uning qilgan ishini ayoli bilan qizi ko‘rib o‘tirgandi. Erkak xonasiga kirib ketganidan keyin ayoli yonimga kelib “Agar buni o‘ldirmasangiz, sizni o‘ldiradi”, deb gapiraverdi. Spirtli ichimlik taʼsirida bo‘lganim uchunmi, bu gaplarni og‘ir qabul qildim. Oradan ancha vaqt o‘tganidan keyin uni ishiga chaqirishdi. U Nurafshondagi “Suvsoz”da ishlardi. Ishga ketishi bilan ayol yana bir litr aroq olib keldi. Hammasini menga ichirdi, moyilligim bo‘lgani uchun rad etmadim. Ketidan gazlangan ichimlik berdi va piyolaning tagida oq narsa borligini ko‘rdim. U-bu narsa tushib qolgandir, deb o‘yladim. Erkak uyiga qaytganidan keyin arra bilan tahdid qilgani esimga tushib, orqa miyasiga kuvalda bilan urib, o‘limiga sabab bo‘ldim. Agar sarhush bo‘lmaganimda, hech qachon bunday qilmagan bo‘lardim.
Qonga belangan erkakni ko‘rib, sarhushligim ham tarqadi. Nima qilib qo‘yganimni eslab, afsuslandim, ammo endi kech edi. To‘qqiz oy na yeganimni, na ichganimni bildim.
Men hali oila qurmagandim, ayol mendan 16 yosh katta edi. U bilan nega tanishganimni eslasam, qilgan ishlarimdan uyalib ketaman. Qotillikka ayolning 1997-yilda tug‘ilgan qizi ham guvoh bo‘lgandi. “Qiz bola qamalmasin deb, unga o‘ldirish bilan tahdid qilganimni”, aytib guvohlik berdim. Ayol esa 13 yilga ozodlikdan mahrum etildi.
Nega bunday qildim, deb ko‘p o‘ylayman. 18 yilga ozodlikdan mahrum bo‘lish juda og‘ir, uni hech bir so‘z bilan taʼriflab berolmayman. Hammasiga ichkilik sabab, har qanday sarhush qiladigan narsa borki, erkak kishini sindiradi. U insonni jinoyat ko‘chasiga olib kiradi. Qilgan ishimdan pushaymonman, ammo endi afsuslarimdan hech qanday foyda yo‘q, deydi mahkum.
Videoni to‘liq holda quyida tomosha qilishingiz mumkin.
Izoh (0)