“Nadomat” loyihasining navbatdagi suhbatdoshi ayni damda Ohangarondagi 44-sonli manzil koloniyasida jazo muddatini o‘tamoqda. Suhbat davomida u qilgan jinoyatidan pushaymon ekanligi haqida gapirdi.
Odiljon Hakimov 1974-yili Andijon viloyatida tug‘ilgan. U Jinoyat kodeksining 104-moddasi bilan aybdor deb topilib, 10 yilga ozodlikdan mahrum etilgan. Mahkum oilaviy kelishmovchilik sabab 2021-yilning 26-oktyabrida turmush o‘rtog‘ini pichoqlagan. Marhuma olgan jarohati sabab kasalxonada vafot etgan.
— Ayolim bilan munosabatimiz yaxshi bo‘lgan. Turmushimiz davomida to‘rt o‘g‘il ko‘rdik. 2019-yili davlat bilan sherikchilik asosida qishloqda bog‘cha tashkil qildik. Markazdan ancha yiroq bo‘lgan Eshon qishlog‘ida 25 o‘rinli bog‘cha ochdik. Bog‘cha faoliyati muvaffaqiyatli boshlanganidan ruhlanib, yana birini ochishga qaror qildik. Ammo bu gal biroz qarzga kirdik. Shundan keyin Rossiyaga borib ishlab kelishga zarurat tug‘ildi. Obodonlashtirish boshqarmasida ishlardim, ammo qarzlardan qutilish uchun ayolim bilan kelishib 5-6 oyga Rossiyaga ketadigan bo‘ldim.
Asli kasbim hisobchi, ammo Rossiyada birdan bunday yaxshi ishda ishlolmas ekansiz. Qo‘limdan ustachilik kelmagani uchun avvaliga biroz qiynaldim. Bir muddat oshpazlik qildim, keyin qurilish firmasiga ishga joylashdim. Orada pandemiya boshlangani uchun ishlar to‘xtab qoldi. Keyin omborxonaga ishga joylashdim. Yaxshi daromad topganimdan keyin ko‘proq pul jo‘natdim, u onasi va opalarining nomiga ham bog‘chalar ochdi. Bog‘chalari soni 8 taga yetganini eshitib xursand bo‘ldim.
Orada hujjatlar bilan bog‘liq muammolar sabab, bir oyda ta’til olib uyga keldim.
30-oktyabr kuni Rossiyaga qaytib ketishim kerak edi. 26-oktyabr kuni ertalab ayolim ishga ketdi. U bilan yaxshi kayfiyatda xayrlashdim, bolalar maktabga ketishgandi. Sovitkichda pivo va aroq bor edi. O‘zi ko‘p ichmayman, ammo o‘sha kuni biroz hordiq chiqarish uchun ichishga qaror qildim. Mehmonxonada ichib o‘tirganimda Rossiyadagi hamkasblarim internet orqali aloqaga chiqdi. Ular bilan gaplashib o‘tirganimda, ayolim bozorlik qilib qaytgan ekan. U bir necha daqiqa eshikni taqillatgan, men eshitmabman. Eshikni ochsam, ertalabki kayfiyatdagi ayolimdan asar ham qolmagan. U bozorlik qilib kelgan ekan, negadir tinimsiz haqorat qila boshladi. Ichimlik taʼsiridami uning gap-so‘zlari juda og‘ir botdi.
45 yoshda muhojir bo‘lib ishlash oson emas. Rossiyada osonlik bilan pul topmayapman, borimni senga jo‘natganman degan fikr xayolimga keldi. Uni tinchlantirishga harakat qildim. Ammo u ro‘zg‘orlikni joylashtirish davomida ham haqorat qilishdan to‘xtamadi. Eng yomoni o‘zi ko‘rmagan ota-onamni ham haqorat qildi. Ular uylanmasimdan avval o‘lib ketishgan, ularni haqorat qilishga ayolimning haqqi yo‘q edi.
U kelmasidan avval meva artib, yeb o‘tirgandim. O‘zim bilmagan holda unga pichoq urdim. Qon chiqayotganini ko‘rib, xushim o‘zimga keldi va pichoqni tashlab Tez yordamga qo‘ng‘iroq qildim. Ammo Andijon viloyatiga tushib qolganimni bilib, go‘shakni qo‘yib, ko‘chaga otildim. Yo‘lak yonida qo‘shni ayollar o‘tirgan ekan. Ularga ayolimni pichoqlab qo‘yganimni aytib, o‘zim Tez yordamni olib kelish uchun rulga o‘tirdim. Ko‘p o‘tmay shifokorlar kelib, uni kasalxonaga olib ketdi. Ammo u bilan kasalxonaga borolmadim, qo‘shnilar militsiyaga xabar bergani uchun meni olib ketishdi. So‘roq vaqtida tergovchiga qo‘ng‘iroq qilib ayolimning o‘limi haqida xabar berishdi.
Qilgan ishimdan pushaymonman. Ichkilik sababmi yoki oilamga ko‘z tegdimi, mudhish jinoyatga qo‘l urdim. To‘rt farzandim bir kunda ham otadan, ham onadan ayrildi. Ularning yonida o‘zimni aybdor hisoblayman. Kun kelib meni tushunishlari va kechirishlaridan umidvorman, — deydi mahkum Odiljon Hakimov.
Videoni to‘liq holda YouTube’dagi “Daryo media” kanalida tomosha qilishingiz mumkin.
Izoh (0)