“Nadomat” loyihasining navbatdagi suhbatdoshi endigina 24 yoshni qarshilagan. Afsuski u guldek yoshligining 4 yilini panjara ortida o‘tkazishga mahkum. Eng yomoni esa ona mehriga muhtoj ikki go‘dagi uni qumsab ulg‘aymoqda.
Mahkuma Laylo Bo‘ronova 24 yoshda, u Jinoyat kodeksining 168-moddasi 3-qismi bilan 4 yilga ozodlikdan mahrum qilingan. Ayol soxta tilla taqinchoqlar sotib, firibgarlik bilan shug‘ullangan.
— Besh yoshimda otam vafot etgan. Onam men va ukamni boqish uchun qiyin kunlarni boshdan kechirgan. Maktabga chiqqanman, ammo moliyaviy ahvolimiz yaxshi bo‘lmagach ikkinchi sinfdan keyin buvim meni qishloqqa olib ketgan. Buvimning qo‘lida tarbiya ko‘rganmiz. Onam 2012-yili va 2016-yili turmushga chiqdi va beshta farzandli bo‘ldi. 2017-yili meni ham turmushga berishdi. Turmush o‘rtog‘im bilan 2020-yilgacha yashab, ikkita qiz farzandli bo‘ldik. Ikki bolam bilan buvimning uyiga borib, yashadik. 2022-yili onam Jinoyat kodeksining 168-moddasi bilan qamalib qoldi. Olti nafar ukam va ikki qizimni boqish, tarbiyalash masʼuliyati menga tushdi.
![](/static/2024/09/12/photo_2024-09-12_22-20-29 (2)-nZyBLITx.jpg)
Uyim yo‘q bo‘lgani uchun ko‘p qiynaldik. Chevarxonaga ishga kirdim, ammo u yerdan olgan maoshim ijara puliga yetsa, ro‘zg‘orga yetmasdi. Shundan keyin tilla sotishga qaror qildim.
Tillalarni nasiyaga olib, ularni sotib, keyin pulini berardim. Bir mijoz mendan tillalarni tekshirib sotib oldi, hammasi yaxshi edi. Ammo bir oy o‘tganidan keyin tillalar soxta ekanligi haqida ustimdan shikoyat yozdi.
Onam ikki dugonasi bilan katta miqdorda tilla taqinchoqlar sotgan. Tillalarga proba urilmagani va litsenziyasi yo‘qligi sabab qo‘lga olingan. Ularning summasi katta bo‘lgani uchun onam qattiq tartibdagi qamoqxonada jazo muddatini o‘taydi.
Men tillani 350 ming so‘mdan olib, grammiga 150 mingdan qo‘yib sotardim. Sotgandan keyin nasiyani uzardim. Tergov boshlanganida u yigitga bu haqda aytdim, “Mayli tillani olib kelishsin, qaytarib olaman, faqat men haqimda aytsang, pulni to‘lashga yordam bermayman”, dedi. Shu bois qo‘rqdim, ammo u bola da’vogarlarning summasini to‘lashga yordamlashdi. Arizalarga ko‘ra, 490 million so‘m pul to‘lashim kerak edi, hozir 85 million so‘m qolgan. Ammo to‘loldik. Onam ikkimiz ketma-ket qamalib, buvimni ham qiynab qo‘ydik.
Ozodlikdan mahrum etilganimdan keyin ko‘p narsalar haqida o‘yladim. To‘g‘ri, jinoyat qilishimizning o‘zi sharmandalik. Ammo men shunga majbur bo‘lganman. Agar turmush o‘rtog‘im yoki o‘gay otam yordam berganida, hech qachon bu ish bilan shug‘ullanmagan bo‘lardim. Hali turmushimdan qonuniy ajrashmaganman, ammo uning oilasi bor. “Ortiqcha pulim yo‘q, sudga arizani o‘zing topshir”, degan. Qamalganimdan keyin bolalarimni ham olib ketgan, ular bilan telefonda bo‘lsa ham gaplashtirmaydi. 4 va 3 yoshli qizlarimni ikki yildan beri ko‘rganim yo‘q. Ularning katta bo‘layotganini ko‘ra olmayotganim, yonida bo‘la olmayotganim alam qiladi. Ko‘p sog‘inaman, hamisha ularni qumsayman, deydi mahkuma Laylo Bo‘ronova.
Videoni to‘liq holda YouTube’dagi “Daryo media” kanalida tomosha qilishingiz mumkin.
Izoh (0)