“Nadomat” loyihasining navbatdagi suhbatdoshi ayni damda 21-sonli ayollar koloniyasida jazo muddatini o‘tamoqda. U O‘zbekiston Respublikasi Jinoyat kodeksining 273-modda 5-qismi bilan aybdor deb topilib, 12 yilga ozodlikdan mahrum etilgan.
Mahkuma — 39 yoshda. Tojikiston fuqarosi.
U katta miqdordagi giyohvand moddani O‘zbekistonga olib kirishga uringan vaqtida qo‘lga olingan.
“Homiladorligimda turmush o‘rtog‘im giyohvand modda bergan”
— Turmush o‘rtog‘im geroin iste’mol qilardi. Pul topish maqsadida og‘ufurushlik biznesiga o‘tdi. O‘sha vaqtlarda qizimga homilador edim, uyimizda ustalar ishlardi, qattiq charchardim. Shundan oz-ozdan iste’mol qilib yursang yengil bo‘lasan deb, erim giyohvand moddalardan berardi. Qattiq o‘rganib qoldim. Shu orada erimni qo‘lga olishdi, Qozog‘istonda 16 yilga hukm o‘qildi. Keyinroq men Tojikistonda 12 yilga qamaldim. Amnistiya berilib, 3 yilda ozod qilindim, — deydi mahkuma.
“Afv qilinganimdan keyin yana shu jinoyat bilan O‘zbekistonda qo‘lga tushdim”
— Qilmishimdan pushaymon bo‘lib tavba qilgandim. Lekin ozodlikka chiqqanimda bir ayol shu og‘uni topib berishimni so‘rab qo‘ymadi. O‘zimga ham pul zarur edi, rozi bo‘ldim. Qozog‘istonlik xaridorlar keladi, 10 kg giyohvand modda kerak dedi. Qidirdim, o‘zbekistonlik bir ayol 7 kg miqdorda borligini aytdi. U va mijozlar bilan Samarqandda ko‘rishdik, 1 kg moddani qo‘ldan qo‘lga berishimiz bilan bizni ushlashdi, — deydi mahkuma.
“Farzandlarim bilan aloqa qilolmayman”
— Farzandim hozir 2 ta, bir qiz, bir o‘g‘il. Katta o‘g‘lim Tojikistondaligimda vafot etgan. Undan keyin yana farzand xohladik, erim qamoqxonadaligida ko‘rishishga ruxsat berildi. Homilador bo‘ldim, o‘g‘il farzandlik bo‘ldik. Giyohvand moddalar iste’mol qilganim homilamga hech qanday ta’sir o‘tkazmagan, qizim sog‘lom. Balki men bilmagan nuqsoni bordir, bexabarman. Hozir bolalarimga onam qaraydi. Ular bilan 8 oydan beri aloqa yo‘q, chet el fuqarolariga telefon berilmas ekan, — deydi mahkuma.
— Men to‘g‘ri yo‘ldan ketolmadim, adashdim. Hech qaysi ayol yomon yo‘lga kirib ketmasin, hech kim menga o‘xshab afsuslanishini xohlamayman.
Videoni to‘liq holda YouTube’dagi “Daryo media” kanalida tomosha qilishingiz mumkin.
Izoh (0)