“Nadomat” loyihasining navbatdagi suhbatdoshi 2019-yili mudhish jinoyatga qo‘l urib, ozodlikdan mahrum etilgan. U ayni kunda jazo muddatini Ohangaron shahridagi 44-son manzil koloniyasida o‘tamoqda.
Mahkum 75 yoshda, u Jinoyat kodeksining 97-moddasi bilan aybdor deb topilib, 13 yilga ozodlikdan mahrum etilgan. U oilaviy kelishmovchilik sabab ayolini qasddan o‘ldirgan.
— Ayolim o‘zimdan olti yosh kichik bo‘lgan. U bilan yashaganimizda ko‘plab oilaviy muammolar bo‘ldi, hatto janjallardan charchab uydan ham chiqib ketdim. Ammo mahalla-ko‘y aralashib, yana uyga olib kelishdi. U bilan ikki qiz va ikki o‘g‘il farzandli bo‘ldik. Feʼli sabab bolalarning ham hayotiga ko‘p aralashardi. Qudalar o‘rtasidagi arzimas janjallar sabab ikki qizim uyimizga qaytib keldi.
Kenja o‘g‘lim bilan birga yashardik. U bilan ham hech kelisholmadi. Arzimas narsani bahona qilib kelin bilan janjal qilaverardi. 2019-yilning mart oyida ham katta janjal bo‘ldi. Oradan bir qancha vaqt o‘tganidan keyin janjallar yanada yiriklashdi. “Uydan chiqib ketsin”, deyaverardi. U ketsa, o‘g‘lingning ahvoli nima kechadi, har holda uchta bolasi bor, deb tushuntirishga harakat qildim. Foydasi bo‘lmadi, ko‘p haqorat qilardi. Uning aytgan gaplarini aytishga ham uyalaman. Oxirgi janjal kuni kelinim nabiram bilan do‘konga chiqib ketgandi. Uni suyug‘oyoqlikda aybladi, kurakda turmaydigan gaplarni aytdi. Oxiri chidolmay, oshxona pichog‘ini tiqib olganimni bilmay qoldim. Uch marta tiqqanimdan keyin eshikni qulflab, kelinimga uyga kirmanglar, deb o‘zimni ichki ishlar xodimlariga topshirdim.
To‘g‘ri, o‘sha payt jahlimni jilovlay olmadim, aqlni ishga solmaganim pand berdi. Ammo bu yillar davomida yig‘ilgandi. Menga ham 70 yoshda qamoqxonaga kelish havas emasdi. Afsuski, jahlni jilovlay olmay, jinoyatga qo‘l urdim.
Besh yildan buyon ozodlikdan mahrumman. Sharoitlari yaxshi, ammo nabiralarimni sog‘inaman. Vaqti-vaqti bilan bolalarim kelib, xabar olishadi. Onamni o‘ldirgansiz, deb tashlab qo‘yishgani yo‘q. Bu yerdagi sharoit qanchalik yaxshi bo‘lmasin, baribir ozodlikka yetmaydi. Ayniqsa, yosh yigitlarning ko‘pligi ko‘nglimni xira qiladi, deydi mahkum.
Videoni quyida to‘liq holda tomosha qiling.
Izoh (0)