Futbol bo‘yicha Angliya chempionatining 23-tur, markaziy bahsi “Manchester Siti” — “Chelsi” (3:1) o‘yinidan keyin Sky Sports efirida Pep Gvardioladan Abduqodir Husanovning ilk uchrashuvi va xatosi haqida so‘rashdi. Ispaniyalik murabbiy yosh shogirdini qo‘llab-quvvatladi.
“U ingliz tilida gapirmaydi, shuning uchun biz Abduqodir bilan hali to‘g‘ridan-to‘g‘ri muloqot qilolmayapmiz. Unda hammasi joyida bo‘ladi. U hali faqat bitta yoki ikkita mashg‘ulotda qatnashdi. Men Chempionlar Ligasidagi muhim o‘yinni inobatga olgan holda, Jon Stounzni jarohatidan keyin maydonga tushirishga shoshiltirishni istamagandim. U o‘yindagi holatdan xulosa qiladi.
Jamoada futbolchilarning birdamligi juda muhim – bugun shuni ko‘rdik. Har qanday o‘yinchi xatoga yo‘l qo‘yishi mumkin. Muxlislar hamisha yangi futbolchilarni qo‘llab-quvvatlaydi. U hali juda yosh va u albatta o‘rganadi”, dedi “Manchester Siti” bosh murabbiyi Sky Sports efirida.
Ma’lumot uchun, “shaharliklar” o‘zbekistonlik himoyachining xatosidan so‘ng to‘p o‘tkazib yubordi. Abduqodir Husanov dastlabki 5 daqiqada bosim sabab o‘yinga moslashib keta olmadi. Keyinchalik bexato harakat qildi.
Uchrashuvda Gvardiola shogirdlari 3:1 hisobida g‘alaba qozondi. Husanov 54 daqiqa maydonda harakat qildi.
Izoh (0)