AQSHning Kaliforniya shtati Los-Anjeles shahrida kuchli o‘rmon yong‘inlari kuzatilmoqda. 30 mingga yaqin kishi evakuatsiya qilindi. Bu haqda BBC xabar berdi.
Kaliforniya hukumati o‘rmon yong‘inlari tufayli favqulodda holat e’lon qilgan. 10 mingga yaqin xonadon xavf ostidaligi ma’lum. Shtat gubernatori Gevin Nyusomning aytishicha, ko‘plab binolar allaqachon yong‘in tufayli vayron bo‘lgan. Mahalliy o‘t o‘chirish xizmati alanga allaqachon 500 gektardan ortiq maydonni qamrab olganini aytgan. Kuchli shamol hamda qurg‘oqchilik tufayli u tarqalishda davom etmoqda.
Evakuatsiya jarayonida yuzaga kelgan tirbandliklar oqibatida o‘nlab avtomobil va boshqa transport vositalari yo‘llarga tashlab ketilgan. O‘t o‘chiruvchilar ularni buldozerlar bilan yo‘l chetlariga tortib, o‘z yo‘lini tozalab olgan. Kaliforniya gubernatori shtatning boshqa hududlariga ham yong‘in tahdid solishi mumkinligi aytmoqda.
“Biz xavfsiz emasmiz. Milliy meteorologiya xizmati shamolning kuchayishi va vaziyatning yomonlashishini prognoz qildi”, deydi Los-Anjeles okrugi yong‘in xavfsizligi boshlig‘i Entoni Marron.
Los-Anjelesda allaqachon 17 000 dan ortiq kishi elektr energiyasisiz qolgan.
Izoh (0)