Toshkent shahrida tramvay liniyasini qurish loyihasi bo‘yicha texnik-iqtisodiy asoslar ishlab chiqiladi. Bu haqda 2025-yil uchun davlat dasturi loyihasida ko‘zda tutilgan.

Yangi avtobuslar

Toshkent shahri jamoat transporti uchun 200 ta elektrobuslar hamda ular uchun quvvatlash uskunalari olib kelinadi.

Nukus, Samarqand va Namangan shaharlari jamoat transporti uchun jami 350 ta elektrobuslar va hamda ular uchun quvvatlash uskunalari xarid qilish loyihalarining texnik-iqtisodiy asoslari ishlab chiqiladi.

“Urganch-Xiva” yo‘nalishiga yangi 10 ta trolleybuslar xarid qilinadi. Hududlarda jamoat transporti uchun yangi jami 700 ta avtobus xarid qilinadi.

Temiryo‘l tizimi

“O‘zbekiston temir yo‘llari” tarkibidagi yuk vagonlar parkini yangilash maqsadida 1200 ta yangi yuk vagonlari ishlab chiqariladi.

“O‘zbekiston temir yo‘llari” tizimida temir yo‘l chiptalarini mobil ilova va elektron to‘lov tizimlari orqali sotish rivojlantirilib, onlayn elektron tizim orqali sotish hajmi 85 foizga yetkaziladi.

Jamoat transporti

Jamoat transportining 50 ta yangi yo‘nalishlar tarmog‘i tashkil etiladi. Jamoat transportida elektron to‘lovlar jozibadorligi oshiriladi va elektron to‘lovlar ulushi o‘rtacha 30 foizga yetkaziladi. 743 ta oraliq bekatlari quriladi va rekonstruksiya qilish ishlari tashkillashtiriladi.

Avtobuslar harakatiga ustuvorlik berish maqsadida hududlarda jamoat transporti uchun alohida avtobus yo‘laklari 150 km ga yetkaziladi. Toshkent shahridagi avtobus yo‘nalishlaridagi mavjud bekatlar ro‘yxati shakllantiriladi.

Toshkent shahri avtobus yo‘nalishlarining bekatlari naqd pullarni qabul qiluvchi bir martalik elektron chipta sotishning o‘z-o‘ziga xizmat ko‘rsatuvchi avtomatlashtirilgan infokiosklar bilan jihozlanadi.

Brutto-shartnoma asosida tashkil etilgan yo‘nalishlardagi barcha avtobuslar QR chiptalarni qabul qiluvchi QR reader qurilmalari bilan jihozlanadi.

Hududlarda 16 ta avtovokzal va avtostansiyalar quriladi va rekonstruksiya qilinadi. Bundan tashqari, xalqaro avtobus yo‘nalishlar soni 36 tadan 40 taga yetkaziladi. 

O‘zbekistonda avtobuslarda naqd puldan voz kechib, elektron to‘lov tizimiga o‘tish

O‘zbekistonda avtobuslarda yo‘l haqi uchun naqd puldan voz kechib, to‘liq elektron to‘lov tizimiga o‘tilishi haqida transport vaziri Ilhom Mahkamov oktyabr oyida jurnalistlar bilan suhbatda maʼlum qilgandi.

“Bekatlarga naqd pulga bilet yoki QR kod sotib olish imkoniyati yaratiladi. Aksariyat bekatlarga infokiosklar o‘rnatiladi. Hozir bu tajriba Toshkent shahrida sinovdan o‘tkazilyapti. Barcha avtobuslarga shu QR kodlarni o‘qiy oladigan devayslar o‘rnatiladi. Ular o‘rnatilgach, tabiiyki konduktorlar ishlamaydi. Sababi naqd pulni yig‘ish ehtiyoji qolmaydi”, degan edi vazir.

2025-yil 1-yanvardan poytaxt jamoat transporti yo‘nalishlarida (avtobus va metropoliten) bir yo‘lovchi qatnovi uchun cheklangan tarif — 3 000 so‘m etib belgilandi. Bunda to‘lov elektron to‘lov tizimi (transport yoki bank kartasi) orqali amalga oshirilganda hozirgidek o‘zgarishsiz qoladi — 1 700 so‘m.

Naqd pul orqali avtobuslarda harakatlanish uchun Toshkent shahridagi bekatlarda va ular yaqinida o‘rnatilgan barcha to‘lov qurilmalari, yaʼni Paynet, MultiPay va Oson infokioskalari orqali bir martalik chipta xarid qilish kerak bo‘ladi.

Toshkentga qaytishi kutilayotgan tramvay

2016-yilning 2-may kuni Toshkentda harakatlanayotgan so‘nggi tramvay yo‘nalishi — “Beshqayrag‘och” dahasi va Ippodrom o‘rtasida qatnovchi 17-yo‘nalish yopilgan va shu tariqa Toshkent tramvayining 115 yillik tarixiga nuqta qo‘yilgandi.

Shavkat Mirziyoyev 2022-yil 19-yanvar kuni Toshkent shahrida jamoat transportini rivojlantirish chora-tadbirlari bo‘yicha taqdimot bilan tanishgandi. “Menimcha” ko‘rsatuvida transport vazirining taqdimoti prezidentga ma’qul bo‘lmagani haqida so‘z borgan. Aynan ushbu ko‘rsatuvda telejurnalist Xayrulla Nuriddinov Toshkentga tramvay qatnovini qaytarish tarafdori ekanini aytib o‘tgan edi.

Shuningdek, prezident 10-fevral kuni Samarqand viloyatiga tashrifi davomida fuqarolar murojaati sabab tramvayni Toshkentga qaytarishni aytib o‘tdi. “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — degan edi prezident.

Toshkent shahar hokimi o‘rinbosari Baxtiyor Rahmonov 16-fevral kuni poytaxt hokimligida bo‘lib o‘tgan matbuot anjumanida Navoiy ko‘chasida tramvay bo‘lmasligini aytgan edi. Transport boshqarma boshlig‘i Anvar Jo‘rayev esa tramvay bo‘yicha takliflar borligini bildirgandi.