Toshkentdagi avtobuslarda 1-yanvardan boshlab naqd pul qabul qilish to‘xtatiladi
Toshkent shahar hokimining “Toshkent shahridagi jamoat transporti tizimida yo‘lkira haqini to‘lashda elektron to‘lov tizimidan foydalanishni rag‘batlantiruvchi tariflarni joriy etish to‘g‘risida”gi qarori qabul qilindi.
Foto: “Daryo” / Madina Nurman
Qarorga ko‘ra, 2025-yil 1-yanvardan poytaxt jamoat transporti yo‘nalishlarida (avtobus va metropoliten) bir yo‘lovchi qatnovi uchun cheklangan tarif – 3 000 so‘m etib belgilandi.
Bunda to‘lov elektron to‘lov tizimi (transport yoki bank kartasi) orqali amalga oshirilganda hozirgidek o‘zgarishsiz qoladi — 1 700 so‘m.
Barcha avtobuslar salonida yo‘lkira haqini naqd pulda olish amaliyotidan voz kechiladi.
Naqd pul orqali avtobuslarda harakatlanish uchun Toshkent shahridagi bekatlarda va ular yaqinida o‘rnatilgan barcha to‘lov qurilmalari yaʼni, Paynet, MultiPay va Oson infokioskalari orqali bir martalik chipta xarid qilish kerak bo‘ladi.
Bundan tashqari, ko‘p martalik — 2, 5, 7 kun amal qiladigan tarif rejalari ham joriy qilinadi.
O‘zbekistonda avtobuslarda yo‘l haqi uchun naqd puldan voz kechib, to‘liq elektron to‘lov tizimiga o‘tilishi haqida transport vaziri Ilhom Mahkamov oktyabr oyida jurnalistlar bilan suhbatda maʼlum qilgandi.
“Bekatlarga naqd pulga bilet yoki QR kod sotib olish imkoniyati yaratiladi. Aksariyat bekatlarga infokiosklar o‘rnatiladi. Hozir bu tajriba Toshkent shahrida sinovdan o‘tkazilyapti. Barcha avtobuslarga shu QR kodlarni o‘qiy oladigan devayslar o‘rnatiladi. Ular o‘rnatilgach, tabiiyki konduktorlar ishlamaydi. Sababi naqd pulni yig‘ish ehtiyoji qolmaydi”, degan edi vazir.
Poytaxt hokimi qarori bilan 2025-yil 1-yanvardan Toshkent shahrining jamoat transporti yo‘nalishlarida (avtobus va metropoliten) qatnovlarni amalga oshirish uchun yo‘lkira haqining quyidagi cheklangan tariflari belgilanmoqda:
bir yo‘lovchi qatnovi uchun cheklangan tarif – 3 000 so‘m. Bunda, bir yo‘lovchi qatnovi uchun 1 martalik to‘lovni elektron to‘lov tizimi orqali amalga oshirilganda rag‘batlantiruvchi chegirma qo‘llanilgan holda – 1 700 so‘m undiriladi;
bir yo‘lovchining bagajini tashish bo‘yicha xizmat uchun – 4 000 so‘m;
qatnovlar soniga bog‘liq holda belgilangan tarif rejalarini hisoblash uchun cheklangan tarif – 1 600 so‘m.
Prezidentning 2023-yil 16-fevraldagi qaroriga asosan Toshkent shahridagi muntazam avtobus yo‘nalishlarida cheklangan tariflar bo‘yicha yo‘lovchilar tashishni brutto-shartnoma asosida tashkil etish va moliyalashtirish tizimiga bosqichma-bosqich o‘tkazish belgilangan.
Izoh (0)