Oliy Majlis Qonunchilik palatasi spikeri o‘rinbosari, deputat Alisher Qodirov yo‘llarda xavfsizlikni ta’minlash masalasiga bag‘ishlangan yig‘ilishda ishtirok etganini ma’lum qilib, qoidabuzarlarni jazolash, tirbandliklarning oldini olish borasidagi fikrlari bilan bo‘lishdi.
Prezident rahbarligida o‘tkazilgan, yo‘llarda xavfsizlikni ta’minlash masalasiga bag‘ishlangan yig‘ilishda ishtirok etdim. Bir yilda 9 mingta avariya, 3 mingga yaqin o‘lim, shundan 600 ga yaqini bolalar. Fojia! Boshqa ta’rif yo‘q.Avvalroq O‘zbekistondagi 2 mingdan ortiq chorraha svetofor bilan jihozlanmagani, yo‘l belgilari yetishmasligi, mamlakatning barcha viloyatlarida zamonaviy avtomaktab va imtihon markazlari tashkil etilishi, O‘zbekistonda yo‘l belgilarini ishlab chiqishda “Avtoyo‘l” monopoliyasi bekor qilinishi to‘g‘risida xabar berilgandi. Prezident Shavkat Mirziyoyevning so‘zlariga ko‘ra, mamlakatda 2021-yilda 10 mingdan ziyod avariyalar sodir etilgan va 9 mingdan ortiq fuqaro jarohat olgan, 2,5 mingga yaqin odam (263 nafar bola) halok bo‘lgan.Juda jiddiy takliflar bildirildi. Katta ishlar boshlangan. Barcha amalga oshirilgan va oshirilishi rejalashtirilayotgan ishlarning samaradorligi tartib va qoidalarga amal qilish bilan bog‘liq.
Qonun faqat insonparvar bo‘lishi emas, insonlarni himoya ham qilishi kerak. Tartibbuzar og‘zini to‘ldirib jamiyatga aql o‘rgatmasin, odamlarni chalg‘itmasin, o‘zidan “tasodiflar qurboni” yasamasin — jazosini olsin, tamom.
Zo‘ravon, g‘o‘daygan, pastkashlik kompleksini mashinasi vositasida tartibga tupuradigan erkatoylar yoki farosatdan mahrum, hayotining mazmuni avtomashinadan iborat, qoidani o‘rganish va amal qilishga aqli ham, sabri ham yetmaydigan “kaltabin grajdanlarni” haydovchilik huquqidangina emas, ozodligidan ham mahrum qilish, 2-3 yil qayta tarbiyalash muassasalariga mahkum qilish to‘g‘ri bo‘ladi deb o‘ylayman.
Bundaylarni to‘xtatish uchun kimlarnidir moli yoki joniga zarar yetishini, bir onani bolasining jasadi ustida chirqillashini kutib o‘tirish kerak emas. Qonun ustuvor — jazo muqarrar bo‘lsin!
Nafaqat yo‘l harakati qoidalari, jamoat tartibi, ma’muriy qoidalarga ham amal qilinishiga erishish kerak. Kim bo‘lsang ham tartibni buzdingmi — jazongni ol, rozi bo‘l, o‘zingni aybla. Tartib bor joydagina taraqqiyot bo‘ladi.
Jamoat transporti tizimli va sifatli bo‘lsa, aholi xususiy avtodan kam foydalanadi. Jamoat transporti tizimsiz va sifatsizligida tirbandlikning o‘rni katta. Tirbandlikni keltirib chiqarayotgan oqimning katta qismi talabalar. Tirbandlik ertalab o‘qishga kelish va qaytish vaqtiga to‘g‘ri kelyapti. Nima uchun davlat xizmatida ish boshlash vaqtini 08:30, oliygohlarda oqish boshlash vaqtini 10:00 ga belgilash mumkin emas? Osmon uzilib yerga tushmaydi, lekin jamoat transportiga ham, avto yo‘llarga ham bosim jiddiy kamayadi.
Yana bir masala, jamoat transportining sifati bilan bog‘liq. Avtobuslarga pul to‘plash rejasi qo‘yilishi tartibsizlikni boshlanish nuqtasi. Avtobusga qanday qilib kunlik reja qo‘yish mumkin? U yo‘lovchi terib yurishi emas, belgilangan vaqtda, belgilangan joyda bo‘lishi kerak. Hatto, yo‘lovchisi bo‘lmasa ham.
Avtobus harakati uchun alohida, ajratib qo‘yilgan yo‘l bo‘lishi avtobusni aniq grafik asosida harakatini ta’minlaydi (namunali o‘rnak — Istanbul). Menimcha bu tramvay uchun qayta tizim yaratishdan arzonroqqa tushadi.
Jazoni kuchaytirish, tartibbuzarlarga betoqat munosabatni shakllantirish bilan bir qatorda, jamoat transportini jozibali va qulay qilish ham avtomashina oqimini kamaytirish, yo‘llardagi fojialar oldini olishga xizmat qiladi.
Izoh (0)