Andijon viloyatida 2024-yilning 11 oyi mobaynida 630 ta yo‘l-transport hodisasi sodir etilgan bo‘lib, oqibatda 137 nafar fuqaro vafot etgan. Bu haqda viloyat YHXB boshlig‘i Rustam Maqsudxo‘jayevning xalq deputatlari viloyat kengashiga qilgan hisobotida ma’lum qilingan.
Qayd etilishicha, Andijon viloyatida 2024-yilning 11 oyi davomida sodir bo‘lgan 630 ta yo‘l-transport hodisasi oqibatida 137 kishi vafot etgan, 426 nafar fuqaro esa turli darajada tan jarohati olgan.
Ta’kidlanishicha, 2024-yilda yo‘l-transport hodisalari va ularning oqibatida jabrlanganlar soni 2023-yilga nisbatan kamaygan. Misol uchun, 2023-yilning 11 oyi davomida 681 ta yo‘l-transport hodisasi sodir etilgan bo‘lib, oqibatda 1139 kishi vafot etgan, shuningdek, 474 nafar fuqaro turli xil og‘ir tan jarohati olib, shifoxonaga yotqizilgan. Natijada YTHlar 7 foizga, vafot etganlar 1,4 foizga, turli tan jarohatlari olganlar esa 10 foizga kamaygan. Shunday bo‘lsa-da, o‘tgan yillarga nisbatan Xonobod shahri, Ulug‘nor, Asaka, Andijon, Qo‘rg‘ontepa va Izboskan tumanlarida o‘lim bilan bog‘liq holatlar oshgan.
Ushbu yo‘l transport hodisalari bolalar ishtirokida tahlil qilinganda o‘tgan 11 oy mobaynida 171 ta sodir etilgan bo‘lib, oqibatda bolalarning 144 tasi tan jarohati olgan, 28 nafar bolalar vafot etgan.
Sentyabr oyida Andijon viloyat Yo‘l harakati xavfsizligi boshqarmasi sobiq boshlig‘i Abdunabi Nosirov Andijon shahridagi maktablar oldida qizil chiroqda o‘tgan va piyodalarga yo‘l bermagan haydovchilar o‘sha maktablarda o‘tkazilgan yig‘ilishlar vaqtida o‘quvchi va o‘qituvchilar oldida izza qilingani haqida xabar berilgan edi.
Yo‘llarda bolalar o‘limi
Dekabr oyida Xo‘jaobod tumanida Lacetti avtomobilini boshqarib ketayotgan haydovchi qatnov qismining belgilangan joyidan kesib o‘tayotgan 12 yoshli bolani urib yubordi. Iyul oyida esa Andijon shahrida Cobalt haydovchisi 10 yoshli qizchani urib yuborib, jarohatlanishiga sabab bo‘lgandi.
Shuningdek, noyabr oyida Jizzax viloyatining Baxmal tumanida Cobalt katta tezlikda voyaga yetmagan ikki qizni urib yubordi. Shuningdek, Samarqandda avtobus maktab yaqinida yo‘lni kesib o‘tayotgan bolani urib yuborib, uning o‘limiga sabab bo‘lgandi. Surxondaryoda 1-sinf o‘quvchisi Nexia urib yuborishidan vafot etgandi.
Sentyabrda Toshkentda BYD 9 yoshli maktab o‘quvchisini urib yuborib, uning o‘limiga sababchi bo‘lgandi. Xuddi shu kabi holat iyul oyida Navoiy viloyati Xatirchi tumanida sodir bo‘lgan. Katta tezlikda harakatlanayotgan BYD piyodalar o‘tish joyidan o‘tayotgan 9 yoshli qizaloqni bosib ketgan. O‘sha oyda Samarqandda 7 yashar bola avtomobil urib ketishi oqibatida vafot etdi. Aprelda Jizzaxda sodir bo‘lgan YTH oqibatida ikki nafar maktab o‘quvchisi halok bo‘ldi.
Bolalar ishtirokida ayanchli YTHlar ko‘paygach, jamoat faollari yo‘llarda bolalar o‘limi uchun siyosiy javobgarlik bo‘lishi kerakligini aytdi.
Izoh (0)