Transport vaziri Ilhom Mahkamov 19-iyul kuni Yevropa tiklanish va taraqqiyot banki Markaziy Osiyo va Mo‘g‘uliston bo‘yicha direktori Huseyn Ozxan boshchiligidagi delegatsiya vakillari bilan uchrashdi. Bu haqda Transport vazirligi matbuot xizmati xabar berdi.
Maʼlum qilinishicha, uchrashuvda mamlakat transport tizimi va infratuzilmasini rivojlantirish borasida amalga oshirilayotgan loyihalar yuzasidan fikr almashildi.
Xususan, Toshkent—Samarqand pulli avtomobil yo‘lining texnik-iqtisodiy asosini yakunlash hamda Samarqand shahri uchun elektrobuslarni xarid qilish loyihalari doirasida amalga oshirilayotgan ishlarni jadallashtirish masalalari muhokama etildi.
Shuningdek, tomonlar Nukus va Namangan shaharlari uchun elektrobuslar hamda Samarqand shahri uchun tramvay xarid qilish bo‘yicha istiqbolli loyihalarini amalga oshirish yuzasidan fikr almashdi.
Ushbu loyihalarni amalga oshirish bo‘yicha hamkorlikdagi ishlarni davom ettirishga kelishib olindi.
Avvalroq 2024-yilda Xitoy Eksimbanki Transport vazirligiga tabiiy gazda harakatlanuvchi 1000 dona avtobus hamda “Toshshahartransxizmat” korxonasi uchun 200 dona elektrobus xaridi uchun jami 180 million dollar miqdorida qarz mablag‘lari ajratishi to‘g‘risida xabar berilgandi. 2024-yilda O‘zbekiston hududlari jamoat transporti uchun 2 ming dona avtobus va 2 ming dona mikroavtobus xarid qilinadi.
Izoh (0)