“Mutaxassislar Toshkent shahriga tramvay kiritilsa, kattaroq tirbandlikka duch kelishimizni aytmoqda” — Transport vaziri Ilhom Mahkamov

Toshkent shahrida tramvay qurilishi katta tirbandlik keltirib chiqarishi mumkin. Bu haqda Transport vaziri Ilhom Mahkamov “Daryo” muxbiriga bergan intervyusida aytdi.

Toshkent shahriga Xitoydan 233 ta avtobus va elektrobuslar olib kelindi. 8-aprel kuni “Yangi O‘zbekiston” bog‘ida trasport vositalarining birinchi partiyasini qabul qilish marosimi o‘tkazildi. Tadbirdan so‘ng Transport vaziri Ilhom Mahkamov elektrobuslardan birida bo‘lib, jurnalistlar bilan suhbatlashdi.

Vazirning aytishicha, O‘zbekiston Xitoyning Yutong va KingLong kompaniyalaridan jami mingta avtobus va elektrobus xarid qilgan.

“Mazkur transport vositalarining umumiy narxi 210 million dollar. Aprel oyi yakunigacha zavodlar barcha avtobus va elektrobuslarni O‘zbekistonga yuboradi. Hozirda Toshkent shahrida jami 1 ming 900 ta avtobus harakatlanadi. Yangi avtobuslarning olib kelinishi avtobuslar ichidagi tiqilinchni kamaytiradi. Shu bilan birga, intervalni ham 3-4 daqiqaga tushiramiz”, — dedi vazirlik rahbari.   

Ilhom Mahkamov suhbat davomida shaharga tramvay liniyasini qaytarish bo‘yicha reja yo‘qligini aytdi.  

“Mutaxassislar Toshkent shahri ichiga tramvay kiritilsa, biz kattaroq tirbandlikka duch kelishimizni aytmoqda. Tramvay yurgandan keyin emas, qurilish jarayonida. Bu ko‘p vaqt va mablag‘ talab qiladi. Shuning uchun yaqin orada prezidentimiz huzurida ‘Yangi Toshkent’ bilan ‘Eski Toshkent’ni bog‘laydigan tramvay loyihasi taqdimotini o‘tkazamiz”, — dedi vazir.

Eslatib o‘tamiz, 2016-yilning bahorida Markaziy Osiyodagi eng qadimgi va yirik yengil relsli transport tizimi — Toshkent tramvaylarining 115-yillik tarixiga nuqta qo‘yilgandi. Bunga Toshkent shahrining o‘sha vaqtlardagi hokimi Rahmonbek Usmonovning tramvay yo‘nalishlari faoliyatini samarasiz deb topgani sabab bo‘lgan. Shundan so‘ng poytaxtdagi vagonlarining yaroqlilari Samarqand viloyatiga yetkazilgan.

O‘zbekiston prezidenti Shavkat Mirziyoyev 2022-yil fevralda Samarqand viloyatiga tashrifi davomida fuqarolar murojaati sabab tramvayni Toshkentga qaytarishni aytib o‘tgan. “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — degan prezident.

Mavzuga doir:

Markaziy Osiyodagi eng katta, qadimiy, sobiq va “bo‘lajak” Toshkent tramvayi tarixi yoki “velosipedni qayta kashf etish” kerakmi(di)?

Toshkentga qaytayotgan tramvay haqida poytaxtda yashovchilarning fikri qanday?