Toshkent hokimligi tramvay yo‘llarini qurish boshlangani to‘g‘risidagi mish-mishlarga munosabat bildirdi

Toshkent shahridagi Alisher Navoiy ko‘chasida tramvay yo‘llarini yotqizish ishlari boshlangani to‘g‘risida xabarlar tarqaldi. Poytaxt hokimligi mazkur holatga munosabat bildirdi.

Ma’lum qilinishicha, 2022-yilda Toshkent shahridagi ko‘chalarni tartibga keltirish (ta’mirlash) rejasiga muvofiq, 14-fevral kuni Toshkentning Alisher Navoiy ko‘chasida ta’mirlash ishlari boshlangan. Bunda Navoiy—Labzak ko‘chasidan Navoiy—Beruniy ko‘chalarigacha bo‘lgan oraliq butkul ta’mirlanishi rejalashtirilgan.

“Bu ishlar Toshkentda yangi tramvay liniyasi yoki tezyurar avtobus uchun yo‘lak tashkil qilish bilan bog‘liq emas”, — deyiladi xabarda.

Eslatib o‘tamiz, 2016-yilning 2-may kuni Toshkentda harakatlanayotgan so‘nggi tramvay yo‘nalishi — “Beshqayrag‘och” dahasi va Otchopar o‘rtasida qatnovchi 17-yo‘nalish yopilgan va shu tariqa Toshkent tramvayining 115 yillik tarixiga nuqta qo‘yilgandi.

2022-yilning yanvar oxirlarida telejurnalist Xayrulla Nuriddinov “O‘zbekiston 24” telekanalida efirga uzatilgan “Menimcha” ko‘rsatuvida Toshkentga tramvay qatnovini qaytarish tarafdori ekanini aytib o‘tgan edi.

“Shahar transporti mavzusi ochilganligidan foydalanib, yana bir taklifni aytmoqchiman. Aholiga qulay va sifatli transport xizmatini ko‘rsatish sohasini takomillashtirish maqsadida Toshkentga tramvaylarni qaytarish kerak, menimcha. Katta va gavjum shaharga tramvay juda asqatadi. Hammamizning esimizda-ku, o‘sha qulay, bejirim, bir tekisda yuradigan, muhimi, ekologiyaga zarar yetkazmaydigan qadrdon tramvaylarimiz. Bilmadim, balki xato qilayotgandirman, lekin bu mening shaxsiy fikrim. Agar poytaxt mutasaddilarining o‘rnida bo‘lganimda, ana shu tashabbus bilan chiqqan bo‘lardim”, — degandi Xayrulla Nuriddinov.

Ma’lumot uchun, Shavkat Mirziyoyev 19-yanvar kuni Toshkent shahrida jamoat transportini rivojlantirish chora-tadbirlari bo‘yicha taqdimot bilan tanishgandi. “Menimcha” ko‘rsatuvida transport vazirining taqdimoti prezidentga ma’qul bo‘lmagani haqida so‘z borgan. Davlat rahbari 10-fevral kuni Samarqand viloyatiga tashrifida “Tramvayni Toshkentga ham qaytarmoqchimiz. Fuqarolardan bu borada ko‘plab xatlar va murojaatlar kelyapti”, — deya qayd etgandi.