Prezident Shavkat Mirziyoyevga “2025-yil uchun O‘zbekiston Respublikasining davlat byudjeti to‘g‘risida”gi qonun ijrosini ta’minlash chora-tadbirlari to‘g‘risida axborot berildi. Bu haqda Prezident matbuot xizmati xabar berdi.
Mazkur qonun 17 ta modda va 10 ta ilovadan iborat bo‘lib, unda asosiy iqtisodiy ko‘rsatkichlar o‘z ifodasini topgan. Xususan, 2025-yilda mamlakat yalpi ichki mahsuloti 6 foiz o‘sishi kutilmoqda.
Konsolidatsiyalashgan byudjet daromadlari 431 trillion so‘m miqdorida, xarajatlari esa 480,5 trillion so‘m miqdorida rejalashtirilgan holda, yalpi ichki mahsulotga nisbatan 3 foiz miqdoridagi taqchillik bilan tasdiqlandi.
Davlat byudjeti va davlat maqsadli jamg‘armalari byudjetlari balansi yalpi ichki mahsulotga nisbatan 2 foiz miqdorida taqchillik bilan shakllantirildi. Bunda davlat byudjeti daromadlari 308,5 trillion so‘m, xarajatlari esa davlat maqsadli jamg‘armalariga transfertlarni inobatga olgan holda 344,8 trillion so‘m miqdorida rejalashtirildi.
2025-yilda Qoraqalpog‘iston Respublikasi byudjetining, viloyatlar hamda Toshkent shahar mahalliy byudjetlarining daromadlari prognozi 65,8 trillion so‘m, xarajatlari prognozi 84,3 trillion so‘m miqdorida bo‘lishi inobatga olingan. Shuningdek, respublika byudjetidan mahalliy byudjetlarga 18,5 trillion so‘m miqdorida tartibga soluvchi byudjetlararo transfertlar o‘tkazib berilishi nazarda tutilgan.
Qonunga ko‘ra, bu yil ham byudjet xarajatlarining ijtimoiy yo‘naltirilganligi saqlab qolindi. Ta’lim, sog‘liqni saqlash, ijtimoiy himoya, fan, madaniyat va sportni rivojlantirish, muhtoj aholini uy-joy bilan ta’minlash kabi tadbirlar uchun jami davlat byudjeti xarajatlarining 52 foizi yo‘naltiriladi.
Mahalliy byudjetlar daromadini ko‘paytirish va mustaqilligini oshirish maqsadida quyidagi soliq turlari qo‘shimcha tarzda tuman va shaharlar byudjetlarida qoldiriladi:
- aylanmadan olinadigan soliq, yuridik shaxslarning yer va mol-mulk soliqlari to‘liqligicha (yirik soliq to‘lovchilar tomonidan to‘lanadigan soliqlar bundan mustasno);
- jismoniy shaxslardan olinadigan daromad solig‘i tushumlarining kamida 50 foizi (yirik soliq to‘lovchilar tomonidan to‘lanadigan soliqlar bundan mustasno);
- davlat mulkini xususiylashtirishdan mahalliy byudjetlarga tushadigan tushumlarning 50 foizi.
Shuningdek, tuman va shaharlar mahalliy kengashlariga ayrim soliq turlari bo‘yicha koeffitsiyent qo‘llash vakolatlar berilgan.
Umuman, davlat byudjeti joriy yilda ham iqtisodiyotni izchil rivojlantirish, ijtimoiy masalalarni manzilli hal etib, aholi farovonligini oshirishga xizmat qiladi.
“2025-yil uchun O‘zbekiston Respublikasining davlat byudjeti to‘g‘risida”gi qonun loyihasi Oliy Majlis Qonunchilik palatasining 3-dekabrdagi majlisida deputatlar tomonidan qabul qilinib, Senatga yuborilgandi. Senatning 18-dekabrdagi yalpi majlisida qonun muhokama etilib, ma’qullangandi.
Senatda 2025-yil uchun davlat byudjeti to‘g‘risidagi qonun aholi farovonligini oshirish, kambag‘allikni qisqartirish, ijtimoiy soha xizmatlari sifatini yanada oshirish, “yashil iqtisodiyot”ni rivojlantirish va atrof muhitni muhofaza qilishga qaratilgani ta’kidlangandi. Qonunda keyingi yilda ham xarajatlarning ijtimoiy yo‘naltirilganligi saqlab qolingan.
Byudjetnomaning muhokamasi chog‘ida senat raisi Tanzila Norboyeva byudjet jarayonlarini ochiq va shaffof bo‘lishiga, mablag‘lar maqsadli va samarali sarflanishini taʼminlashga alohida eʼtibor qaratish lozimligini aytib o‘tgandi.
“2025-yil uchun O‘zbekiston Respublikasining davlat byudjeti to‘g‘risida”gi qonun 24-dekabr kuni qabul qilindi.
Izoh (0)