O‘zbekiston prezidenti yordamchisi Saida Mirziyoyeva O‘zbekistonga davolanishga olib kelingan falastinlik bolalar holidan xabar oldi.
Mirziyoyeva davolanayotgan falastinlik bolalarga Prezident salomi va eng ezgu tilaklarini yetkazdi.
“Shuncha qiyinchiliklarga qaramay, ular qalbida beg‘uborlik va mo‘jiza istagini saqlab qolgani chindan ham hayratlanarli. Umid qilamanki, e’tibor va mehr so‘zlari ularning ko‘nglida yorug‘ kelajakka ishonch uyg‘otadi. Ularga va jafokash Falastin xalqiga tinchlik va farovonlik tilaymiz”, deydi Prezident yordamchisi.
Falastindan 100 kishi O‘zbekistonga vaqtincha evakuatsiya qilindi
100 nafar falastinlik yarador ayollar va bolalar ularning hamrohlari bilan birga O‘zbekistonga evakuatsiya qilindi. Ushbu evakuatsiya 26-dekabr kuni ikki davlatning Sog‘liqni saqlash vazirliklari hamkorligida prezident Shavkat Mirziyoyev tashabbusi bilan amalga oshirildi.
Shavkat Mirziyoyev 11-noyabr kuni navbatdan tashqari arab-islom sammitida so‘zlagan nutqida urushda jabrlangan falastinlik bolalar va ayollarni O‘zbekiston shifoxonalarida beg‘araz davolashga tayyor ekanini aytgandi.
Evakuatsiya qilingan falastinliklar yurtlariga qaytgunlaricha O‘zbekistonda qoladi. Ushbu bemor falastinliklar davolanish va sog‘liqlarini qayta tiklash uchun reabilitatsiya markazlari va shifoxonalarga joylashtiriladi.
Izoh (0)