2024-yil 13-dekabr kuni Toshkent shahrida prezident Shavkat Mirziyoyev ishtirokida energetika sohasidagi yangi loyihalarni ishga tushirish marosimi bo‘lib o‘tdi. Tadbir yakunida poytaxt hokimi Shavkat Umrzoqov jurnalistlarga intervyu bergan, deya xabar qildi “Daryo” muxbiri.
Shavkat Umrzoqovga berilgan savollardan biri shaharda isitish tizimi qanday ishlayotgani haqida bo‘lgan.
Bugun 11 mingdan ortiq kvartira bo‘lsa, qancha xonadon “otopleniye” bo‘yicha shikoyat qilyapti? Ular 100 dona atrofida — bu yaxshi ko‘rsatkich. Avval bunday kam emas edi. Shikoyatlarni o‘rgansak, asosan uyning bitta xonasida batareyalar isityapti, ikkinchisida yaxshi isitmayapti deydigan masalalar ko‘tariladi. Hozir Veolia kompaniyasi 1960-yildagi eski quvurlarni almashtiryapti. Ikki yildan beri yerosti tarmoqlaridagi issiqlik energiyasi va gaz sohasi raqamlashtirilib, yangi quvurlar o‘rnatilyapti. Kabellar tortilib, podstansiyalar qurilyapti. Joriy yilning o‘zida (2024-yil–tahr.) 28 ta podstansiya to‘liq modernizatsiya qilindi. Bu butun shahar uchun qo‘shimcha 600 MVt quvvat degani. Hozir tizimga ketayotgan suvning harorati bilan issiqlik stansiyasiga qaytayotgan haroratini qarasanglar maksimum 15 daraja. Eng rivojlangan Yevropa davlatlarini ham ko‘ring, ularda bu ko‘rsatkich -15 gradus bo‘lib qaytyapti. Umuman olganda, 100 nafar odamning uyi yaxshi isimayotgani, qaysidir quvur isitmayotgani normal holat. Muammolar bor edi, issiqlik oxirgi nuqtalarga yetib bormayotgandi. Bu hal qilinmoqda. Ham elektr ishlab chiqarib, ham issiqlik beradigan loyihalar amalga oshirilyapti, dedi hokim.
Toshkent hokimligi 2021-yil 29-sentyabrda Fransiyaning Veolia kompaniyasi bilan 30 yillik shartnoma tuzgan. Hujjatda kompaniya shaharning markazlashtirilgan issiqlik taʼminoti tizimini ekspluatatsiya qilishi, texnik xizmat ko‘rsatishi va boshqarishi belgilangan. O‘shanda poytaxtda 9,2 mingta ko‘p qavatli uy va 3,5 mingga yaqin ijtimoiy obyekt markazlashgan issiqlik taʼminotiga ulangani maʼlum edi. Magistral va tarqatish tarmoqlarning 72 foizi, markaziy qozonxonalarning hammasi, mahalliy qozonxonalarning 90 foizi eskirgani aytilgan.
Eslatib o‘tamiz, Toshkent shahrida issiqlik tizimi havo sezilarli salqinlashgani va aholi noroziliklariga qaramay o‘tgan yilning 7-noyabridan ishga tushirildi.
2024-yilda poytaxtda issiqlik taʼminoti narxi ikki marta 15 foizdan (jami 30 foiz) oshirildi. Jumladan, aholiga issiqlik va issiq suv taʼminoti xizmatlari narxi 2-aprelda 15 foizga ko‘tarilgan. Keyin 12-sentyabrdagi hokim qarori bilan issiqlik taʼminoti narxi yana 15 foizga oshirildi. Narxlar ko‘tarilishiga sabab sifatida issiqlik va issiq suv ishlab chiqarish uchun zarur bo‘lgan energiya resurslari – gaz va elektr energiyasi tariflari oshgani taʼsir ko‘rsatgani aytilgan.
Manbalarga ko‘ra, O‘zbekistonda issiqlik va issiq suv tariflari 2025-yil davomida yana ikki marta oshiriladi.
Izoh (0)