Ukraina Tashqi ishlar vazirligi spikeri Georgiy Tixiy JCh—2026 uchun Yevropa qit’asidagi saralashga qur’a tashlash marosimi translyatsiyasi chog‘ida Qrim yarimorolining bir qismi bo‘lmagan xarita ko‘rsatilgani ortidan bayonot berdi.
Departament vakili yana takrorlangan voqeadan noroziligini bildirib, endi bu voqea uchun FIFA’dan omma oldida uzr so‘rashini kutishini aytgan.
“Kecha efirda xalqaro chegaralarni xato chizish orqali siz nafaqat xalqaro huquqqa zid harakat qildingiz, balki Rossiya propagandasini, urush jinoyatlarini va Ukrainaga qarshi tajovuzlarni qo‘llab-quvvatladingiz.
Biz siz uchun xaritani to‘g‘riladik va sizdan ommaviy ravishda uzr so‘rashingizni kutamiz”, dedi Tixiy X (sobiq Twitter) ijtimoiy tarmog‘ida.
Eslatib o'tamiz, avvalroq FIFA rasmiy saytida JCh—2026 saralash turniriga qur’a tashlash tartibi haqida video e’lon qilingan edi. Unda siyosiy sabablarga ko‘ra bir-biri bilan uchrasha olmaydigan jamoalar haqida so‘z bordi. Ko‘rsatilgan xaritada Qrim hududi Ukraina deb belgilanmagan.
Qur’a natijalariga ko‘ra, Ukraina D guruhidan o‘rin oldi. D guruhida Ukraina milliy jamoasidan tashqari, Islandiya, Ozarbayjon va Fransiya – Xorvatiya juftligi g‘olibi ham o‘rin oladi.
Izoh (0)