Jahon chempionati saralashi doirasidagi Qatar—O‘zbekiston uchrashuvidan so‘ng Srechko Katanes matbuot anjumanida qatnashib o‘yin haqida fikr bildirdi va jurnalistlar savollariga javob berdi.
“Birinchi bo‘limda yo‘q joydan ikkita gol o‘tkazib yubordik. Keyin o‘zimizni o‘nglab ikkita gol urdik. Bu futbol, biz oxirida gol o‘tkazib mag‘lubiyatga uchradik”, - deydi murabbiy.
Katanes Masharipovning shamollaganiga qaramay o‘yinga qo‘shilganiga izoh berdi.
“U yaxshi saviyadagi futbolchi bo‘lganligi uchun ham uni tushirdik. U o‘yinning ikkinchi bo‘limida maydonga tushirishni iltimos qilgandi. Zaxira paytida men tavakkalchilikka qo‘l urdim”, dedi O‘zbekiston murabbiyi.
Mehmonlar ustozi Masharipov maydonga tushganida bir pozitsiyada ikki futbolchi paydo bo‘lib qolganiga izoh berishni xohlamasligi va hammaning o‘z fikri borligini ta’kidladi.
Qatarlik jurnalist jamoaning bugungi o‘yini va kelajakdagi imkoniyatlar haqida so‘radi.
“Qanday qilib so‘nggi daqiqada oddiy gol o‘tkazdik, buni bilmayman. Ancha paytdan beri mag‘lubiyatga uchramayotgan edik, shuning uchun bu muxlislar uchun og‘ir. Oldimizda yana 5 ta o‘yin bor”, deya javob berdi bosh murabbiy.
Katanes so‘nggi daqiqalarda himoyachi tushirib durangga harakat qilish kerak, degan topshiriq berilmaganini aytib o‘tdi.
“Men futbolchilarga bunday demadim. Bilmayman nima uchun bunday bo‘ldi, boshqa o‘yinlarda ham ko‘rsangiz ham shunday voqealarni ko‘rasiz. Bu savolga javobni dunyoning eng kuchli murabbiylari ham bera olmaydilar. Bunday vaziyatda futbolchilar durang natija qoniqarli bo‘ladi deb o‘ylashadi”, deydi bosh murabbiy.
Ma’lumot uchun O‘zbekiston terma jamoasi ushbu mag‘lubiyatdan so‘ng ham turnir jadvalida ikkinchi o‘rinda bormoqda. Jamoa keyingi turni Shimoliy Koreyaga qarshi 19-noyabr kuni o‘tkazadi.
Izoh (0)