FIFA sayti Jahon chempionati saralashi Osiyo mintaqasida ajoyib o‘yin ko‘rsatayotgan 6 yosh futbolchi faoliyatiga to‘xtaldi. Ular orasida O‘zbekiston milliy jamoasi futbolchisi Abbosbek Fayzullayev ham bor. “Daryo” ushbu maqolani to‘liqligicha taqdim etadi.
Mustahkam himoyachilar, markazda o‘yinni tashkil qilib beruvchilar, ayyor qanot futbolchilari va aniq zarba beruvchi hujumchilar: FIFA Osiyo saralashining so‘nggi bosqichida ko‘zni qamashtirayotgan oltita yulduzni ko‘zdan kechirdi.
- Osiyoda Jahon Chempionati saralash bosqichi uchinchi raundi tugashiga atigi to‘rt o‘yin qoldi.
- Yosh iste’dodlar 6-turda yana bir bor porladi.
- Abdulla, Amin, Fayzullayev, Ferdinan, Kim va Majid alohida ajralib turdi.
Osiyo yoshlar darajasida ajoyib natijalarga ega: o‘tgan beshta FIFA U-20 Jahon Chempionatining uchtasida Osiyo Futbol Konfederatsiyasi (AFC)ga a’zo davlatlar yarim finalga yetib borgan, shuningdek, U-17 va U-23 darajalarida ham o‘zini ko‘rsatgan.
Ammo muammo ko‘pincha yosh iste’dodlarni haqiqiy yulduzlarga aylantirishda bo‘lgan. FIFA Jahon Chempionati—26 saralash bosqichida davom etayotgan o‘yinlar qit’ada iste’dodlar kam ekanini inkor etadi.
FIFA yaqinda o‘tgan OFK saralash o‘yinlarida o‘z mahoratini namoyish etgan oltita yulduzni yoritib beradi.
Harib Abdulla (BAA)
Fabio Limaning to‘rtta goli BAAning Qatar ustidan qozongan yirik g‘alabasida asosiy e’tiborni tortgan bo‘lishi mumkin, ammo amirlik yosh iste’dod Harib Abdullaning bu muvaffaqiyatdagi hissasini e’tibordan chetda qoldirib bo‘lmaydi.
Dinamik hujumchi o‘zining tezligi va bevosita hujumlari bilan doimiy xavf tug‘dirib, bir nechta gollarni tashkil qilishda muhim rol o‘ynadi. U ikkinchi golga olib kelgan penaltini ishlab oldi va uchinchi ajoyib golga zamin yaratgan jarima zarbasiga ham sababchi bo‘ldi.
Yusuf Amin (Iroq)
Osiyo qit’asida Iroqdan ko‘ra ko‘proq yosh iste’dodlarga ega millatni topish qiyin. Husayn Ali, Ali Jasim, Zidan Iqbol va Ali Al-Hamadi kabi o‘yinchilar hali o‘smirlik yoshida bo‘lsa-da, birinchi jamoada muntazam o‘ynashmoqda.
Bu safar esa yana bir yosh yulduz o‘zini ko‘rsatib, jamoasiga mundialning final bosqichiga ikkinchi bor yo‘l olishi uchun muhim uch ochko taqdim etdi. Dortmundning "Borussiya" klubida tarbiyalangan 21 yoshli Yusuf Amin Muskatdagi o‘yinda Aymen Husaynning uzatmasini aniqlik va xotirjamlik bilan golga aylantirib, jamoaning yagona golini urdi.
Abbosbek Fayzullayev (O‘zbekiston)
Yaqindagina OFK’ning Yilning eng yaxshi yosh futbolchisi mukofotiga sazovor bo‘lgan Abbosbek Fayzullayev o‘z obro‘sini yanada oshirishda davom etmoqda. Koreya Xalq Demokratik Respublikasini mag‘lub etishda ko‘rsatgan mahoratli o‘yini bunga yana bir misol bo‘ldi.
Bo‘yi kichik bo‘lsa-da, yuqori texnik mahorati va himoyachilarni dog‘da qoldirishga bo‘lgan qat’iyati bilan ajralib turadigan Moskva klubi vakili Vyentyan shahrida bo‘lib o‘tgan o‘yinda yagona golni kiritdi. U jarima maydonchasining tashqarisidan kuchli zarba yo‘llab “Oq bo‘rila”ni ilk bor Jahon chempionatining final bosqichiga chiqish yo‘lida imkoniyatlarini yaxshiladi.
Marselino Ferdinan (Indoneziya)
Uzoq vaqtdan beri “Garuda”ning navbatdagi buyuk iste’dodi sifatida e’tirof etilayotgan Marselino Ferdinan, so‘nggi sakkiz finaldan oltitasida qatnashgan Saudiyadek kuchli jamoani mag‘lub qilishda markaziy rol o‘ynadi. Mahalliylashtirilgan yulduzlar soni ortib borayotgan tarkibda, 20 yoshli Surabayalik futbolchi mahalliy futbol ham yetuk iste’dodlarni yetishtirayotganini ko‘rsatdi.
Jakartadagi Gelora Bung Karno Stadionida, futbolning ulkan sahnalaridan birida, Marselino 2:0 hisobidagi g‘alabaning ikkala golini ham kiritdi. Birinchi golni penalti nuqtasi yaqinidan murakkab zarba bilan amalga oshirdi, ikkinchisini esa chaqqon reaksiyasi bilan to‘pni darvozaga yo‘llab, o‘z xalqining saralash bosqichidagi umidlarini qayta jonlantirdi.
Kim Yu-song (Koreya Xalq Demokratik Respublikasi)
O‘yinning ko‘p qismini himoyada o‘tkazadigan jamoa safida Kim Yu-song saralash bosqichi davomida haqiqiy ajralib turuvchi futbolchiga aylandi. 21 yoshli pxenyanglik himoyachi o‘zining tezligi, aniq uzatmalari va o‘yinni puxta anglash qobiliyati bilan vaqtida to‘pni egallab olish va raqibni to‘xtatishda mohirlik ko‘rsatmoqda.
U Koreya XDRning to‘rt kishilik mudofaasida faxriy futbolchi Chang Kuk-chol uchun ideal sherik bo‘lib xizmat qilmoqda. Laosdagi neytral hududda o‘tgan o‘yinda ham u ajoyib o‘yin ko‘rsatib, uchta muhim zarbani to‘sdi, ikki bor to‘pni hujumchidan olib qo‘ydi va bir necha marta zaruriy bloklar amalga oshirdi.
Yusuf Majid (Kuvayt)
Kuvayt futbolining katta umidi bo‘lgan Yusuf Majid birinchi bo‘limda raqib tomonidan nazorat ostida turdi. Shunday bo‘lsa-da, to‘p yo‘q paytdagi uzluksiz harakati bilan ajralib turdi. Bu uning o‘yinining kam baholanadigan qismi hisoblanadi. Uning tinimsiz to‘psiz harakati Iordaniyadek xavfli jamoa uchun maydonda joy topishni qiyinlashtirdi. Ikkinchi bo‘lim o‘rtalarida esa Yusuf hal qiluvchi assistni amalga oshirib, hisobni tenglashtiruvchi golga sabab bo‘ldi va Kuvaytning saralashdagi umidlarini saqlab qoldi.
Ma’lumot uchun Osiyo qit’asidagi mundial saralashining 6-tur uchrashuvlari 19-noyabr kuni o‘tkazildi. Qolgan 4 tur 2025-yilda bo‘lib o‘tadi. 20-mart kuni bo‘ladigan 7-tur bahsida O‘zbekiston milliy jamoasi Toshkentda Qirg‘izistonni qabul qiladi.
Izoh (0)