Markaziy bankning Bank nazorati qo‘mitasi noyabr oyidagi yig‘ilishlarida (9-marta) 32 ta masalani ko‘rib chiqdi va tegishli qarorlar qabul qildi. Bu haqda MB matbuot xizmati xabar berdi.
Maʼlum qilinishicha, ro‘yxatga olish va ruxsat berish yo‘nalishida 13 ta masala ko‘rib chiqilgan. Shu jumladan:
- kredit tashkilotlari ustaviga kiritilgan o‘zgartirishlarni ro‘yxatdan o‘tkazish — 1 ta;
- banklarda audit o‘tkazish huquqini berish uchun auditorlik malaka sertifikatini taqdim etish — 1 ta;
- kredit tashkilotlarining ustav fondidagi ulushiga egalik qilish uchun ruxsat berish — 3 ta;
- tijorat banklari kuzatuv kengashi va boshqaruvi aʼzolari hamda muhim ahamiyatga ega xodimlarining nomzodlarini ko‘rib chiqishga doir — 8 ta.
Shu bilan birga, Kredit tashkilotlarining moliyaviy holatiga oid 19 ta masala – Markaziy bankning ko‘rsatmalari va prudentsial meʼyorlari talablarining bajarilishi, tijorat banklarida amalga oshirilgan nazorat tadbirlari, shuningdek, tijorat banklari va mikromoliya tashkilotida o‘tkazilgan o‘rganish va tekshirishlar natijalari ham muhokama qilindi.
Tijorat banklari, mikromoliya tashkilotlari va to‘lov tashkilotlarida o‘tkazilgan o‘rganishlar natijasida aniqlangan qoidabuzarliklar uchun 22 ta bank va 3 ta to‘lov tashkiloti chora va sanksiyalar qo‘llanilishi to‘g‘risida ogohlantirildi.
Shu bilan birga, amaldagi qonunchilik, Markaziy bank tomonidan o‘rnatilgan iqtisodiy meʼyorlar talablari hamda ko‘rsatmalariga rioya qilinmaganligi, shuningdek, o‘rganish va inspeksiya tekshiruvlari davomida aniqlangan qoidabuzarliklar uchun 8 ta bank, 7 ta to‘lov tashkiloti va 12 ta mikromoliya tashkilotiga nisbatan jarima sanksiyasi qo‘llanildi.
Bundan tashqari, Bank nazorati qo‘mitasining tegishli qarori bilan 7 ta bank 2025-yil uchun tizimli ahamiyatga molik banklar sifatida belgilandi.
Izoh (0)