Yevropa Ittifoqining navbatdagi sanksiyalari paketiga Rossiya oltini ham kiritilishi mumkin. Bu haqda Reuters 23—24-iyun kunlari bo‘lib o‘tadigan YI sammiti uchun tayyorlangan takliflar loyihasiga tayanib xabar bermoqda.
“Rasmiy vakillarning so‘zlariga ko‘ra, hozir yangi paket tayyorlanmayotgan bo‘lsa-da, uning ta’siriga tushishi mumkin bo‘lgan tarmoqlarni aniqlash bo‘yicha ishlar davom etmoqda, bunda oltin ehtimoliy nishonlardan biridir”, — deya tushuntiradi agentlik. Reuters ma’lumotlariga ko‘ra, sanksiyalar oltinga ta’sir qilishi mumkinligini taxmin qilayotgan davlatlardan biri Daniyadir.
“Sanksiya ishlari bilan tanish manbaning Reuters agentligiga ma’lum qilishicha, Yevrokomissiya sanksiyalarning navbatdagi raundiga Rossiya oltinini qo‘shish ustida ishlamoqda”, — ta’kidladi agentlik.
Reuters xabariga ko‘ra, yangi hujjatda sanksiyalarning yettinchi paketi haqida to‘g‘ridan-to‘g‘ri so‘z yuritilmaydi, u ittifoq a’zolarining turli pozitsiyalari o‘rtasidagi murosa hisoblanadi. Skandinaviya va Sharqiy Yevropa davlatlari zudlik bilan yangi sanksiyalar joriy etishni, Germaniya va Niderlandiya esa mavjud choralarni qo‘llashga e’tibor qaratishni taklif qilgan.
Oltin Rossiya Markaziy bankining asosiy aktivlaridan biridir. Urush boshlanganidan so‘ng Markaziy bankning 300 milliard dollarga yaqin oltin-valyuta aktivlari G‘arb sanksiyalariga muvofiq muzlatib qo‘yildi. AQSH g‘aznachiligi Markaziy bankka aloqador oltin bilan bog‘liq har qanday operatsiyalar sanksiyalar ostida ekanini ma’lum qildi. Markaziy bank zaxiralarining qariyb yarmi oltin ko‘rinishida saqlanadi.
Rossiyadagi ikkinchi yirik oltin qazib oluvchi “Polimetall” kompaniyasi vakillarining ta’kidlashicha, kompaniya G‘arb sanksiyalari ostida qolmagan bo‘lsa-da, transport kompaniyalari uskunalarni tashishdan bosh tortgani uning faoliyatiga ta’sir qilgan.
Izoh (0)