Rossiya moliya sektori Ukrainaga hujum boshlanganidan keyin G‘arb tomonidan joriy qilingan sanksiyalar tufayli ko‘rgan bevosita talafotlar hajmi yuzlab milliard dollarga teng. Bu haqda Bloomberg Rossiya Moliya vazirligining ichki hujjatiga tayanib xabar bermoqda.
Agentlik ma’lumotlariga ko‘ra, ushbu ma’ruza 29-avgust kuni yuqori mansabli rossiyalik amaldorlar ishtirokidagi yig‘ilish uchun tayyorlangan. Hujjat mazmunini majlisdan xabardor bo‘lgan manbalar tasdiqlagan.
Vazirlik, hujjatga muvofiq, bevosita talafotlarga quyidagilarni kiritgan:
- fond bozori kapitalizatsiyasining 40 foizga pasayishi;
- bank kapitalining 10 foizga pasayishi;
- Markaziy bankning 300 milliard dollar miqdoridagi muzlatib qo‘yilgan valyuta zaxiralari;
- 4,6 trillion rubl hajmida muzlatilgan yevrobondlar;
- 563 milliard rubl muzlatilgan chakana aktivlar.
Rossiya Moliy vazirligi izohlardan bosh tortdi. Bloomberg qayd etishicha, 12-sentabr kuni Rossiya prezidenti Vladimir Putin “Rossiya tashqi bosimni dadillik bilan eplayotganini”, iqtisodiyot esa “asta-sekinlik bilan barqarorlashayotgani, tekislanayotgani, o‘sish trayektoriyasiga chiqayotgani”ni aytgan.
Avgust oxirida, Bloomberg ma’lumotlariga ko‘ra, Rossiya hukumatida sanksiyalarning iqtisodiyotga ta’siri haqidagi ma’ruza taqdim etilgan. Ma’ruzani bir necha oylar davomida tayyorlagan rossiyalik mansabdorlar va ekspertlar fikricha, Rossiya iqtisodiyotning muhim sektorlariga xavf soluvchi G‘arb sanksiyalari tufayli yanada uzoqroq davom etuvchi va chuqurroq bo‘lgan retsessiyaga duch kelishi mumkin.
Fevral oxiridan buyon AQSH, Yevroittifoq va ularning ittifoqdoshlari Ukrainadagi maxsus operatsiyalar tufayli, Rossiyaga qarshi sanksiyalarning bir nechta paketini kiritdi. Cheklov choralari Markaziy bank, oltin-valyuta zaxiraalri, eng yirik banklar, import va eksport, energetika sektori, rossiyalik biznesmenlar va siyosatchilarga taalluqli bo‘ldi.
Rossiya hukumati G‘arb sanksiyalarini noqonuniy deb hisoblaydi. Putin ularni “tentakona va mulohazasiz” deb atadi. Shuningdek, Yevroittifoq “sanksiya bezgagi”dan ko‘radigan bevosita talafot kelasi yili 400 milliard dollardan oshishi mumkinligini ham aytdi.
Avvalroq Yevrokomissiya rahbari Ursula fon der Lyayyen Rossiyaga qarshi sanksiyalarni saqlab qolishga va’da bergan edi.
Izoh (0)