Yevroittifoq Rossiyaga sanksiyalar orqali bosim o‘tkazishda davom etmoqchi va yarashish yo‘llarini qidirishni rejalashtirmayapti. Bu haqda Yevrokomissiya rahbari Ursula fon der Lyayyen ma’lum qildi, deb yozadi “RBK”.
“Ochiq-oydin aytmoqchiman: sanksiyalar saqlanib qoladi. Biz uchun xotirjamlik qidirish emas, balki qat‘iyatimizni ko‘rsatish vaqti keldi, buni aniq tushunib olishlari kerak. Ukrainani moluyaviy qo‘llab-quvvatlash masalasida ham xuddi shu narsa o‘rinli”, — dedi u.
Uning ishontirishicha, Yevroittifoqning Ukraina bilan birdamligi “barqaror bo‘ladi”. Uning so‘zlariga ko‘ra, Yevroittifoq birinchi kundanoq Ukraina tomonida turib, qurol-yarog‘ bilan yordam bermoqda, moliyaviy ko‘mak taqdim etmoqda va Rossiyaga qarshi “dunyo guvoh bo‘lgan eng kuchli sanksiyalar”ni kiritmoqda.
Fon der Lyayyenning fikriga ko‘ra, Rossiya moliyaviy sektori allaqachon “hayotni ta’minlash qurilmalariga ulab qo‘yilgan”, chunki Rossiya banklarining to‘rtdan uch qismi xalqaro bozorlardan uzib qo‘yilgan, bir mingga yaqin xalqaro kompaniyalar esa mamlakatni tark etgan.
Bundan tashqari, uning ta’kidlashicha, Rossiyada mashinalar ishlab chiqarish o‘tgan yil ko‘rsatkichlariga nisbatan 75 foizga pasaygan.
Shuningdek, u Rossiya harbiy sanoati idish yuvish mashinalari va sovitgichlar chiplaridan foydalanayotganini da’vo qildi. “Rossiya sanoati xarobalar ichida qoldi”, — dedi fon der Lyayyen.
Apreldayoq u G‘arb sanksiyalari Rossiya iqtisodiyoti barqarorligiga tobora kuchliroq ta’sir o‘tkazayotganini, defolt esa shunchaki “vaqt masalasi” ekanini aytgandi.
Fevral oxiridan buyon AQSH, Yevroittifoq va ularning ittifoqdoshlari Ukrainadagi maxsus operatsiyalar tufayli, Rossiyaga qarshi sanksiyalarning bir nechta paketini kiritdi. Cheklov choralari Markaziy bank, oltin-valyuta zaxiraalri, eng yirik banklar, import va eksport, energetika sektori, rossiyalik biznesmenlar va siyosatchilarga taalluqli bo‘ldi.
Rossiya hukumati G‘arb sanksiyalarini noqonuniy deb hisoblaydi. Putin ularni “tentakona va mulohazasiz” deb atadi. Shuningdek, Yevroittifoq “sanksiya bezgagi”dan ko‘radigan bevosita talafot kelasi yili 400 milliard dollardan oshishi mumkinligini ham aytdi.
Yevropa diplomatiyasi rahbari Jozep Borrel Yevropani Rossiyaga qarshi sanksiyalar oqibatlari yuzasidan strategik jihatdan sabrli bo‘lishga chaqirgan edi.
Izoh (0)