O‘zbekistonning bir nechta banki birin-ketin Rossiyaning “Yunistrim” pul o‘tkazmalari tizimi bilan ishlashni to‘xtatgani haqida xabarlar tarqala boshladi. Mazkur xabarlarga oydinlik kiritish maqsadida “Daryo” Markaziy bank bilan bog‘landi.
Olingan ma‘lumotga ko‘ra, haqiqatan ham 14 ta bank ushbu xalqaro pul o‘tkazmalari tizimi bilan ishlashni to‘xtatgan. Dastlab “Xalq banki”, “Ipoteka bank”, “Turon bank” va “Oriyent Finans bank” tomonidan, kun yakuniga yaqin Trastbank tomonidan eʼlon qilindi. Ushbu banklar tizim bilan ishlash vaqtincha to‘xtatilganini maʼlum qilgan va noqulayliklar uchun uzr so‘ragan.
Qayd etilishicha, O‘zbekiston banklaridan Kapitalbank bir yil oldin, “Ipak Yo‘li” banki esa o‘tgan yil fevral oyida ushbu tizim bilan ishlashini to‘xatgan edi. Ijtimoiy tarmoqlarlarda mazkur pul o‘tkazmalari tizimidan foydalanish yana bir nechta bankda, xususan, “Asakabank”, “Agrobank”, “Aziya Alyans bank”, “Aloqabank” va Infinbank’da to‘xtatilgani haqida xabarlar paydo bo‘ldi. “Agrobank”, “Asakabank”, “Aziya Alyans bank”larning rasmiy veb-saytlarida pul o‘tkazmalari bo‘limida keltirilgan tizimlar ro‘yxatida “Yunistrim” olib tashlangan.
Biroq “Aloqabank” va Infinbank rasmiy veb-saytining tegishli bo‘limida yuqoridagi tizim bo‘yicha maʼlumotlar va shartlar hozircha mavjud. Boshqa tijorat banklari hozircha ushbu tizim bilan ishlash yoki ishlamasligi to‘g‘risida rasman maʼlum qilmagan.
Mazkur tizim egasi “Yunistrim” banki AQSHning bloklovchi sanksiyasiga tushgan edi. Tizim Rossiyadan O‘zbekistonga pul o‘tkazmalari o‘tkazishda yetakchilardan biri hisoblanadi.
Bundan tashqari, Qirg‘iziston banklari ham Rossiyaning “Yunistrim” pul o‘tkazmalari tizimi bilan ishlashni to‘xtatdi. Respublikadagi oltita bank tizim orqali tranzaksiyalar amalga oshirilmasligini bildirdi. Sanksiya cheklovlari tufayli dollardagi kiruvchi va chiquvchi pul o‘tkazmalari mavjud emasligi aytilmoqda.
Shuningdek, Tojikiston banklari ham Rossiyaning ushbu to‘lov tizimi orqali pul o‘tkazmalarini to‘xtatdi.
Izoh (0)