Xurshid Qoraboyev Toshkent viloyati hokimining qishloq va suv xo‘jaligi masalalari bo‘yicha o‘rinbosari etib tayinlandi. Bu haqda viloyat hokimligi matbuot xizmati xabar berdi.
Xurshid Qoraboyev 1987-yil Parkent tumanida tug‘ilgan. Mehnat faoliyatini Toshkent viloyati iqtisodiyot bosh boshqarmasida birinchi toifali mutaxassis vazifasida boshlagan.
2011-2016-yillarda u mazkur tashkilotda yetakchi mutaxassis, bosh mutaxassis, bo‘lim mudiri o‘rinbosari, bo‘lim boshlig‘i, boshqarma boshlig‘ining o‘rinbosari lavozimlarida ishlagan.
Shuningdek, u Vazirlar Mahkamasi, Qishloq xo‘jaligi vazirligida, “O‘zbekoziqovqatxolding” kompaniyasi, Toshkent viloyati investitsiyalar va tashqi savdo boshqarmasida masʼul lavozimlarda faoliyat yuritgan.
Xurshid Qoraboyev mazkur lavozimga tayinlangunga qadar Savdo-sanoat palatasi Qishloq xo‘jaligi sohasida tadbirkorlikka ko‘maklashish boshqarmasi boshlig‘i lavozimida ishlab kelayotgan edi.
Oktyabr oyida Toshkent viloyatida prezident raisligida o‘tkazilgan videoselektor yig‘ilishida faoliyatidagi kamchiliklar va sohadagi ishlar qoniqarsiz olib borilayotgani uchun viloyat hokimining birinchi o‘rinbosari Erkin Muxitdinov lavozimidan ozod etilgan edi. Keyinroq u Ekologiya vazirligining O‘rmon, bioxilmaxillik va ekoturizm siyosatini yuritish departamenti boshlig‘i lavozimiga tayinlandi.
Izoh (0)