Farg‘onada korrupsiyaga qarshi kurashuvchi mansabdor xodim korrupsiyada ayblanib, qamoqqa olindi.
Davlat organlarida korrupsion holatlarni aniqlash va ularga chek qo‘yish yo‘nalishida Davlat xavfsizlik xizmati xodimlari tomonidan Bosh prokuratura huzuridagi departament bilan hamkorlikda tezkor tadbir o‘tkazilgan.
Xususan, “Farg‘ona viloyati hududiy elektr tarmoqlari korxonasi” aksiyadorlik jamiyatining Korrupsiyaga qarshi kurashish va komplayens nazorat bo‘limi boshlig‘i viloyatdagi tumanlardan birining elektr tarmoqlari korxonasi bosh muhandisi 2024-yil 9 oylik faoliyati davomida yo‘l qo‘ygan kamchiliklari uchun kelgusida ishdan bo‘shatilmasligi evaziga, undan 1000 AQSH dollari olgan vaqtida ashyoviy dalillar bilan ushlangan.
Tergovga qadar tekshiruv davomida ushbu noqonuniy ishga AJning xodimlar bilan ishlash bo‘limi boshlig‘i ham aloqador ekani aniqlangan.
Hozirda mazkur ikki shaxsga nisbatan Jinoyat kodeksining 25, 168-moddasi (firibgarlik) 3-qismi “a” bandi va 28, 211-moddasi (pora berish) 1-qismi bilan jinoyat ishi qo‘zg‘atilib, qamoq ehtiyot chorasi qo‘llanilgan.
Mansabdorlar bilan bog‘liq jinoyatlar
Noyabr boshlarida DXX xodimlari tomonidan Bosh prokuratura huzuridagi departament bilan hamkorlikda o‘tkazilgan tezkor tadbirda Chirchiq shahar hokimining o‘rinbosari 1 million dollar olgan vaqtida ushlangandi. Andijon viloyati Ekologiya boshqarmasining Asaka tuman bo‘limi bosh inspektori muqaddam sudlanganligiga qaramasdan, 20 ming dollar olayotganida qo‘lga tushdi. U 30 yilga ijara asosida ajratilgan 5 sotix yer maydonini tadbirkorlik bilan shug‘ullanmoqchi bo‘lgan fuqaro nomiga rasmiylashtirib berishni vaʼda qilgan.
Samarqandda Qurolli kuchlar xizmatchisi, soliqchi, qo‘riqlash va kadastr xodimlari firibgarlik jinoyati ustida ushlandi.
Iyul oyida Surxondaryo viloyati prokuraturasi bo‘lim katta prokurori 10 ming dollar pora olayotganida qo‘lga tushgandi. Avgustda DXX Toshkent va Jizzax viloyatlarida hokim yordamchilarining noqonuniy harakatlariga chek qo‘ydi.
Izoh (0)